ธมฺมทินฺนา มหามายา วิสาขา จาปิ สตฺตมีติ เอวํนามา หุตฺวา นิพฺพตฺตา. ตตฺรายํ สํฆทาสี เอกํ พุทฺธนฺตรํ เทวมนุสฺเสสุ สํสริตฺวา อิมสฺมึ พุทฺธุปฺปาเท องฺครฏฺเฐ ภทฺทิยนคเร เมณฺฑกเสฏฺฐิปุตฺตสฺส ธนญฺชยสฺส

@๓ ฉ.ม.,อิ. ๔ สี. สตฺติมาติ เสฏฺฐิโน อคฺคมเหสิยา สุมนเทวิยา นาม กุจฺฉิสฺมึ นิพฺพตฺติ, วิสาขาติสฺสา นามํ อกํสุ. ตสฺสา สตฺตวสฺสิกกาเล ทสพโล เสลพฺราหฺมณสฺส จ อญฺเญสญฺจ โพธเนยฺยพนฺธวานํ อุปนิสฺสยสมฺปตฺตึ ทิสฺวา มหาภิกฺขุสํฆปริวาโร จาริกํ จรมาโน ตสฺมึ รฏฺเฐ ตํ นครํ ปาปุณิ.

ตสฺมึ จ สมเย เมณฺฑโก คหปติ ตสฺมึ นคเร ปญฺจนฺนํ มหาปุญฺญานํ เชฏฺฐโก หุตฺวา เสฏฺฐิฏฺฐานํ กาเรสิ. ปญฺจ มหาปุญฺญา นาม เมณฺฑโก เสฏฺฐี, จนฺทปทุมา นาม ตสฺเสว อคฺคมเหสี, ตสฺส จ ปุตฺโต ธนญฺชโย นาม ตสฺส ภริยา สุมนเทวี นาม, เมณฺฑกเสฏฺฐิสฺส ทาโส ปุณฺโณ นามาติ. น เกวลญฺจ เมณฺฑกเสฏฺฐีเยว, พิมฺพิสารมหาราชสฺส ปน อาณาปวตฺติฏฺฐาเน ปญฺจ อมิตโภคา นาม อเหสุํ โชติโก ชฏิโล เมณฺฑโก ปุณฺโณ กากพลิโยติ. ๑- เตสุ อยํ เมณฺฑกเสฏฺฐี ทสพลสฺส อตฺตโน นครํ สมฺปตฺตภาวํ สุตฺวา ปุตฺตสฺส ธนญฺชยเสฏฺฐิโน ธีตรํ วิสาขํ ทาริกํ ปกฺโกสิตฺวา เอวมาห "อมฺม ตุยฺหํปิ มงฺคลํ อมฺหากํปิ มงฺคลํ, ตว ปริวาริเกหิ ปญฺจหิ ทาริกาสเตหิ สทฺธึ ปญฺจ สกฏสตานิ อารุยฺห ปญฺจหิ ทาสิสเตหิ ปริวุตา ทสพลสฺส ปจฺจุคฺคมนํ กโรหี"ติ. สา ปิตามหสฺส วจนํ สุตฺวา ตถา อกาสิ. การณาการเณสุ ปน กุสลตฺตา ยาวติกา ยานสฺส ภูมิ, ยาเนน คนฺตฺวา ยานา ปจฺโจโรหิตฺวา ปตฺติกาว สตฺถารํ อุปสงฺกมิตฺวา วนฺทิตฺวา เอกมนฺตํ อฏฺฐาสิ. อถสฺสา จริยวเสน สตฺถา ธมฺมํ เทเสสิ. เทสนาปริโยสาเน ปญฺจหิ ทาริกาสเตหิ สทฺธึ โสตาปตฺติผเล ปติฏฺฐาสิ. เมณฺฑกเสฏฺฐีปิ โข สตฺถุ สนฺติกํ คนฺตฺวา สตฺถารํ วนฺทิตฺวา เอกมนฺตํ นิสีทิ, ๒- อถ สตฺถา ตสฺสปิ จริยวเสน ธมฺมํ เทเสสิ. โส เทสนาปริโยสาเน โสตาปตฺติผเล ปติฏฺฐาย สตฺถารํ สฺวาตนาย นิมนฺเตตฺวา ปุนทิวเส อตฺตโน นิเวสเน ปณีเตน ขาทนีเยน โภชนีเยน พุทฺธปฺปมุขํ ภิกฺขุสํฆํ ปริวิสิตฺวา เอเตนุปาเยน อฑฺฒมาสํ มหาทานํ อทาสิ. สตฺถา ภทฺทิยนคเร ยถาภิรนฺตํ วิหริตฺวา ปกฺกามิ.