ตโต ธนญฺชยเสฏฺฐี ธีตุยา มหาลตาปสาธนสฺส นิฏฺฐิตภาวํ ญตฺวา "เสฺว ทาริกํ เปสิสฺสามี"ติ ธีตรํ สมีเป นิสีทาเปตฺวา "อมฺม ปติกุเล วสนฺติยา นาม อิมญฺจิมญฺจ อาจารํ สิกฺขิตุํ วฏฺฏตี"ติ โอวาทํ อทาสิ. อยํ มิคารเสฏฺฐี อนฺตรคพฺเภ นิสินฺโน ๑- ธนญฺชยเสฏฺฐิโน โอวาทํ อสฺโสสิ. โสปิ เสฏฺฐี ธีตรํ เอวํ โอวทิ:-

อมฺม สสุรกุเล วสนฺติยา นาม อนฺโตอคฺคิ พหิ น นีหริตพฺโพ, พหิ อคฺคิ อนฺโต น ปเวเสตพฺโพ, ททนฺตสฺเสว ทาตพฺพํ, อททนฺตสฺส น ทาตพฺพํ, ททนฺตสฺสาปิ อททนฺตสฺสาปิ ทาตพฺพํ, สุขํ นิสีทิตพฺพํ, สุขํ ภุญฺชิตพฺพํ, สุขํ นิปชฺชิตพฺพํ, อคฺคิ ปริจริตพฺโพ, อนฺโตเทวตา นมสฺสิตพฺพาติ.

อิมํ ทสวิธํ โอวาทํ ทตฺวา ปุนทิวเส สพฺพา เสนิโย สนฺนิปาเตตฺวา ราชเสนาย มชฺเฌ อฏฺฐ กุฏุมฺพิเก ปาฏิโภเค คเหตฺวา "สเจ เม ธีตุ คตฏฺฐาเน โทโส อุปฺปชฺชติ, ตุเมฺหหิ โสเธตพฺโพ"ติ วตฺวา นวโกฏิอคฺฆนเกน มหาลตาปสาธเนน ธีตรํ ปสาธิตฺวา นฺหานจุณฺณมูลํ จตุปณฺณาสสกฏธนํ ๒- ทตฺวา ธีตาย สทฺธึ นิพทฺธํ ปริจารินิโย ๓- ปญฺจสตา รูปทาสิโย ๔- ปญฺจ อาชญฺญรถสตานิ สพฺพํ สกฺการญฺจ ๕- สตสตํ ทตฺวา โกสลราชานญฺจ มิคารเสฏฺฐิญฺจ วิสฺสชฺเชตฺวา ธีตุ คมนเวลาย วชํ อธิฏฺฐายเก ๖- ปุริเส ปกฺโกสิตฺวา "ตาตา มม ธีตุยา คตฏฺฐาเน ขีรปานตฺถํ เธนูหิ, ยานโยชนตฺถํ อุสเภหิ จ อตฺโถ โหติ, ตสฺมา มม ธีตุ คมนมคฺเค วชทฺวารํ วิวริตฺวา ปุถุลโต อฏฺฐ อุสภานิ โคคเณน ปูเรตฺวา ติคาวุตมตฺตํ ๗- อสุกา นาม กนฺทรา อตฺถิ, โคยูเถ ๘- ตํ ฐานํ ปตฺเต เภริสญฺญาย วชทฺวารํ ปิทเหยฺยาถา"ติ. เต "สาธู"ติ เสฏฺฐิสฺส วจนํ สมฺปฏิจฺฉิตฺวา ตถา อกํสุ. วชทฺวาเร วิวเฏ อุฬารุฬาราเยว คาวิโย นิกฺขมึสุ. ทฺวาเร ปิทหิเต ปน วิสาขาย ปุญฺญพเลน ทมฺมคาโว พลวคาโว จณฺฑคาโว จ พหิ ลงฺฆิตฺวา มคฺคํ ปฏิปชฺชึสุ. อถ วิสาขา สาวตฺถินครํ ๙- ปตฺตกาเล จินฺเตสิ "ปฏิจฺฉนฺนยานสฺมึ นุ โข นิสีทิตฺวา ปวิสามิ,