"เย น ททนฺตี"ติ อิทํปิ ยาจิตกํ อุปกรณํ คเหตฺวา เย น ปฏิเทนฺติ, เตสํ น ทาตพฺพนฺติ สนฺธาย วุตฺตํ.
"ททนฺตสฺสาปิ อททนฺตสฺสาปิ ทาตพฺพนฺ"ติ อิทํ ปน ทุคฺคตเกสุ ญาติมิตฺเตสุ สมฺปตฺเตสุ ปฏิทาตุํ สกฺโกนฺตุ วา มา วา, ทาตุเมว วฏฺฏตีติ สนฺธาย วุตฺตํ.
"สุขํ นิสีทิตพฺพนฺ"ติ อิทํปิ สสฺสุสสุเร ทิสฺวา อุฏฺฐาตพฺพฏฺฐาเน นิสีทิตุํ น วฏฺฏตีติ สนฺธาย วุตฺตํ.
"สุขํ ภุญฺชิตพฺพนฺ"ติ อิทํ ปน สสฺสุสสุรสามิเกหิ ปุเรตรํ อภุญฺชิตฺวา เต ปริวิสิตฺวา สพฺเพหิ ลทฺธาลทฺธํ ญตฺวา ปจฺฉา สยํ ภุญฺชิตุํ วฏฺฏตีติ สนฺธาย วุตฺตํ.