สา เอกทิวสํ นคเร นกฺขตฺตสมเย วตฺตนฺเต "อนฺโตนคเร คุโณ นตฺถี"ติ ทาสีหิ ปริวุตา สตฺถุ ธมฺมกถํ โสตุํ คจฺฉนฺตี "พุทฺธานํ สนฺติกํ อุตฺตรเวเสน ๔- คนฺตุํ อยุตฺตนฺ"ติ มหาลตาปสาธนํ โอมุญฺจิตฺวา ทาสิยา หตฺเถ ทตฺวา สตฺถารํ อุปสงฺกมิตฺวา อภิวาเทตฺวา เอกมนฺตํ นิสีทิ, สตฺถา ธมฺมกถํ กเถสิ. สา สตฺถุ ธมฺมเทสนาปริโยสาเน ทสพลํ วนฺทิตฺวา นคราภิมุขา ปายาสิ. สาปิ ทาสี อตฺตนาปิ คหิตปสาธนสฺส ฐปิตฏฺฐานํ อสลฺลกฺเขตฺวา คจฺฉนฺตี ปสาธนตฺถาย ปฏินิวตฺติ. อถ นํ วิสาขา "กหํ ปเนตํ ฐปิตนฺ"ติ ปฏิปุจฺฉิ. คนฺธกุฏิปริเวเณ อยฺเยติ. โหตุ เช คนฺตฺวา อาหร, คนฺธกุฏิปริเวเณ ฐปิตกาลโต ปฏฺฐาย อาหราปนนฺนาม ๕- อมฺหากํ อยุตฺตํ. ตสฺมา ตํ วิสฺสชฺเชตฺวา ทณฺฑกมฺมํ กริสฺสาม. ตตฺถ ปน ฐปิเต อยฺยานํ ปลิโพโธ โหตีติ.

ปุนทิวเส สตฺถา ภิกฺขุสํฆปริวาโร วิสาขาย นิเวสนทฺวารํ สมฺปาปุณิ. นิเวสเน จ นิพทฺธํ ปญฺญตฺตานิ อาสนานิ. วิสาขา สตฺถุ ปตฺตํ คณฺหิตฺวา สตฺถารํ เคหํ ปเวเสตฺวา ปญฺญตฺตาสเนสุเยว นิสีทาเปตฺวา กตภตฺตกิจฺเจ สตฺถริ ตํ ปสาธนํ อาหริตฺวา สตฺถุ ปาทมูเล นิกฺขิปิตฺวา "อิทํ ภนฺเต ตุมฺหากํ ทมฺมี"ติ อาห. สตฺถา "อลงฺกาโร นาม ปพฺพชิตานํ น วฏฺฏตี"ติ ปฏิกฺขิปิ. ชานามิ ภนเต,