โสปิ เสฏฺฐี ตสฺส อมตภาวํ อาวชฺเชนฺโต ๓- "โคปาลเกหิ นีโต"ติ สุตฺวา ปุน สหสฺสํ ทตฺวา อาณาเปตฺวา อามกสุสาเน ฉฑฺฑาเปสิ. ตสฺมึ จ กาเล เสฏฺฐิสฺส ฆเร อชปาลโก สุสานํ นิสฺสาย อชิกา หเรติ. ๔- อเถกา เธนุ อชิกา ทารกสฺส ปุญฺเญน มคฺคา โอกฺกมฺม คนฺตฺวา ทารกสฺส ขีรํ ทตฺวา คตา. ตโต นิวตฺตมานาปิ ตตฺเถว คนฺตฺวา ขีรมทาสิ. อชปาลโก จินฺเตสิ "อยํ อชิกา ปาโตปิ อิมสฺมา ฐานา โอกฺกมิตฺวา คตา, กึ นุ โข เอตนฺ"ติ คนฺตฺวา โอโลเกนฺโต ตํ ทารกํ ญตฺวา ๕- "มหาปุญฺโญ เอส ทารโก, ติรจฺฉานคตาปิสฺส คุณํ ชานนฺติ, ปฏิชคฺคิสฺสามิ นนฺ"ติ คณฺหิตฺวา เคหํ คโต.

ปุนปิ ๖- เสฏฺฐี "มโต นุ โข ทารโก, โน มโต"ติ โอโลกาเปนฺโต อชปาลเกน คหิตภาวํ ญตฺวา สหสฺสํ ทตฺวา อาณาเปตฺวา "เสฺว อิมํ นครํ เอโก สตฺถวาหปุตฺโต ปวิสิสฺสติ, อิมํ ทารกํ เนตฺวา จกฺกมคฺเค ฐเปถ, เอวํ ตํ สกฏจกฺกํ ฉินฺทนฺตํ คมิสฺสตี"ติ อาห. ตํ ตตฺถ นิกฺขิตฺตํ สตฺถวาหปุตฺตสฺส ปุริมสกเฏ โคณา ทิสฺวา จตฺตาโร ปาเท ถมฺเภ วิย โอตาเรตฺวา อฏฺฐํสุ. สตฺถวาโห "กึ นุ โข เอตนฺ"ติ เตสํ ฐิตการณํ โอโลเกนฺโต ๗- ทารกํ ทิสฺวา "มหาปุญฺโญ ทารโก, ปฏิชคฺคิตุํ วฏฺฏตี"ติ คเหตฺวา อคมาสิ.

เสฏฺฐีปิ ตสฺส จกฺกปเถ มตภาวํ วา อมตภาวํ วา โอโลกาเปนฺโต สตฺถวาเหน คหิตภาวํ ญตฺวา ตสฺสปิ สหสฺสํ ทตฺวา ๘- นครโต อวิทูรฏฺฐาเน ปปาเต ปาตาเปสิ.