อปรํปิ อุตฺตรึ การณํ สุโณหิ, เยน การเณน เทฺว สมฺมาสมฺพุทฺธา เอกกฺขเณ น อุปฺปชฺชนฺติ. ยทิ มหาราช เทฺว สมฺมาสมฺพุทฺธา เอกกฺขเณ อุปฺปชฺเชยฺยุํ, เอกปุคฺคโล ๑- อคฺโค พุทฺโธติ ยํ วจนํ, ตํ มิจฺฉา ภเวยฺย. เชฏฺโฐ พุทฺโธติ ฯเปฯ เสฏฺโฐ พุทฺโธติ. วิสิฏฺโฐ พุทฺโธติ. อุตฺตโม พุทฺโธติ. ปวโร พุทฺโธติ. อสโม พุทฺโธติ. อสมสโม พุทฺโธติ. อปฺปฏิโม ๒- พุทฺโธติ. อปฺปฏิภาโค พุทฺโธติ. อปฺปฏิปุคฺคโล พุทฺโธติ ยํ วจนํ, ตํ มิจฺฉา ภเวยฺย. อิมํปิ ๓- โข ตฺวํ มหาราช การณํ อตฺถโต สมฺปฏิจฺฉ, เยน การเณน เทฺว สมฺมาสมฺพุทฺธา เอกกฺขเณ น อุปฺปชฺชนฺติ.

อปิจ มหาราช พุทฺธานํ ภควนฺตานํ สภาวปกติกา เอสายํ ๔- เอโกเยว พุทฺโธ โลเก อุปฺปชฺชติ. กสฺมา? การณา มหนฺตตาย สพฺพญฺญุพุทฺธคุณานํ. อญฺญํปิ มหาราช ยํ มหนฺตํ โหติ, ตํ เอกํเยว โหติ. ปฐวี มหาราช มหนฺตา, ๕- สา เอกาเยว. สาคโร มหนฺโต, โส เอโกเยว. สิเนรุ คิริราชา มหนฺโต, โส เอโกเยว. อากาโส มหนฺโต, โส เอโกเยว. สกฺโก มหนฺโต, โส เอโกเยว. พฺรหฺมา ๖- มหนฺโต, โส เอโกเยว. ตถาคโต อรหํ สมฺมาสมฺพุทฺโธ มหนฺโต, โส เอโกเยว. ยตฺถ เต อุปฺปชฺชนฺติ, ตตฺถ อญฺเญสํ โอกาโส น โหติ. ตสฺมา ตถาคโต อรหํ สมฺมาสมฺพุทฺโธ เอโกเยว โลเก อุปฺปชฺชตีติ. สุกถิโต ภนฺเต นาคเสน ปโญฺห โอปมฺเมหิ การเณหี"ติ.

@๕ ฉ.ม. มหนฺตี ๖ มิลินฺท. มาโร มหนฺโต, โส เอโกเยว. มหาพฺรหฺมา...