นิมิตฺตกุสลตา นาม กสิณนิมิตฺตสฺส อุคฺคหกุสลตา. สมเย จิตฺตสฺส ปคฺคณฺหนตาติ ยสฺมึ สมเย สิถิลวิริยตาทีหิ ๓- ลีนํ จิตฺตํ โหติ, ตสฺมึ สมเย ธมฺมวิจย- วิริยปีติสมฺโพชฺฌงฺคสฺส สมุฏฺฐาปเนน จิตฺตสฺส ๔- ปคฺคณฺหนํ. สมเย จิตฺตสฺส นิคฺคณฺหนตาติ ยสฺมึ สมเย อจฺจารทฺธวิริยตาทีหิ อุทฺธตํ จิตฺตํ โหติ, ตสฺมึ สมเย ปสฺสทฺธิสมาธิอุเปกฺขาสมฺโพชฺฌงฺคสฺส สมุฏฺฐาปเนน จิตฺตสฺส นิคฺคณฺหนํ. สมเย สมฺปหํสนตาติ ยสฺมึ สมเย จิตฺตํ ปญฺญาปฺปโยคมนฺทตาย วา อุปสมสุขานธิคเตน ๕- วา นิรสฺสาทํ โหติ, ตสฺมึ สมเย อฏฺฐสํเวควตฺถุปจฺจเวกฺขเณน สํเวเชติ. อฏฺฐ สํเวควตฺถูนิ นาม ชาติชราพฺยาธิมรณานิ จตฺตาริ, อปายทุกฺขํ ปญฺจมํ, อตีเต วฏฺฏมูลกํ ทุกฺขํ, ปจฺจุปฺปนฺเน อาหารปริเยฏฺฐิมูลกํ ทุกฺขํ อนาคเต วฏฺฏมูลกํ ทุกฺขนฺติ. รตนตฺตยคุณานุสฺสรเณเนว ปสาทํ ชเนติ, อยํ วุจฺจติ "สมเย สมฺปหํสนตา"ติ.

@ป.สู. ๑/๑๑๘/๓๑๔ ๓ ฉ.ม. อติสิถิลวีริยตาทีหิ ๔ ฉ.ม. ตสฺส

@๕ ฉ.ม. อุปสมสุขานธิคเมน