@๙ ม. สํสุมฺภิสฺสตีติ ตุเมฺห ทิวา อุทฺเทสญฺจ สายํ อุทฺเทสญฺจ มํ โอโลเกตฺวา ฐเปถ, ปจฺจูสกาเล อุทฺเทสํ ปน มา ฐปยิตฺถา"ติ เอวํ วตฺวา มลฺลย ๑- วาสิมหาสํฆรกฺขิตตฺเถรสฺส สนฺติกํ อคมาสิ. เถโร อตฺตโน ปณฺณสาลาย ปริภณฺฑํ กโรนฺโต ตํ อโนโลเกตฺวาว "ปฏิสาเมหิ อาวุโส ตว ปตฺตจีวรนฺ"ติ อาห. ภนฺเต เอโก เม พฺยาธิ อตฺถิ, สเจ ตุเมฺห ตํ ติกิจฺฉิตุํ สกฺโกถ, ปฏิสาเมสฺสามีติ. อาวุโส อุปฺปนฺนํ โรคํ ติกิจฺฉิตุํ สมตฺถสฺส สนฺติกํ อาคโตสิ, ปฏิสาเมหีติ. สุวโจ ภิกฺขุ "อมฺหากํ อาจริโย อชานิตฺวา เอวํ น วกฺขตี"ติ ปตฺตจีวรํ ฐเปตฺวา เถรสฺส วตฺตํ ทสฺเสตฺวา ๒- เอกมนฺตํ นิสีทิ.

เถโร "ราคจริโต อยนฺ"ติ ญตฺวา อสุภกมฺมฏฺฐานํ กเถสิ. โส อุฏฺฐาย ปตฺตจีวรํ อํเส ลคฺเคตฺวา เถรํ ปุนปฺปุนํ วนฺทิ. กึ อาวุโส มหาภูต ๓- อติเรกนิปจฺจการํ ทสฺเสสีติ. ภนฺเต สเจ อตฺตโน กิจฺจํ กาตุํ สกฺขิสฺสามิ, อิจฺเจตํ กุสลํ. โน เจ, อิทํ เม ปจฺฉิมทสฺสนนฺติ. คจฺฉาวุโส มหาภูต ตาทิสสฺส ยุตฺตโยคสฺส กุลปุตฺตสฺส น ฌานํ วา วิปสฺสนา วา มคฺโค วา ผลํ วา ทุลฺลภนฺติ. โส เถรสฺส กถํ สุตฺวา นิปจฺจการํ ทสฺเสตฺวา อาคมนกาเล ววตฺถาปิตํ ฉนฺนเสปณฺณิคจฺฉมูลํ คนฺตฺวา ปลฺลงฺเกน นิสินฺโน อสุภกมฺมฏฺฐานํ ปาทกํ กตฺวา วิปสฺสนํ ปฏฺฐเปตฺวา อรหตฺเต ปติฏฺฐาย ปจฺจูสกาเล อุทฺเทสํ สมฺปาปุณิ. เอวรูปานํ คนฺถวเสน วิกฺขมฺภิตกิเลสา ตถา วิกฺขมฺภิตาว โหนฺติ.

เอกจฺจสฺส ปน วุตฺตนเยเนว ธุตงฺคานิ ปริหรโต กิเลโส โอกาสํ น ลภติ, ธุตงฺควเสน วิกฺขมฺภิโตว โหติ. โส ตํ ตถา วิกฺขมฺภิตเมว กตฺวา วิวชฺเชตฺวา ๔- อรหตฺตํ คณฺหาติ คามนฺตปพฺภารวาสิมหาสิวตฺเถโร วิย. เถโร กิร มหาคาเม ติสฺสวิหาเร ๕- วสนฺโต เตปิฏกํ อตฺถวเสน จ ปาลิวเสน จ อฏฺฐารส มหาคเณ วาเจสิ. ๖- เถรสฺส โอวาเท ฐตฺวา สฏฺฐิสหสฺสา ๗- ภิกฺขู อรหตฺตํ ปาปุณึสุ. เตสุ เอโก ภิกฺขุ อตฺตนา ปฏิวิทฺธธมฺมํ อารพฺภ อุปฺปนฺนโสมนสฺโส จินฺเตสิ "อตฺถิ