เอวํปิ จสฺส อโหสิ "อุปริปเญฺหน เหฏฺฐาปญฺหํ ชานิสฺสามิ, เหฏฺฐาปเญฺหน อุปริปญฺหนฺ"ติ. ตสฺมาปิ อิมํ ปญฺหํ ปุจฺฉิ. สตฺถา ปุริมนเยเนว จินฺเตตฺวา ยถา น ชานาติ, เอวเมว กเถนฺโต ปุนปิ "กตตฺตา จ พฺราหฺมณ อกตตฺตา จา"ติ อาห. พฺราหฺมโณ ตสฺมึ ปติฏฺฐาตุํ อสกฺโกนฺโต "อลํ โข ปน ๔- อีทิสสฺส ปุริสสฺส สนฺติกํ อาคเตน ชานิตฺวา ๕- คนฺตุํ วฏฺฏติ, สกวาทํ ปหาย สมณํ โคตมํ อนุวตฺติตฺวา มยฺหํ อตฺถํ คเวสิสฺสามิ, ปรโลกมคฺคํ โสเธสฺสามี"ติ สนฺนิฏฺฐานํ กตฺวา สตฺถารํ อายาจนฺโต น โข อหนฺติอาทิมาห. อถสฺส นิหตมานตํ ญตฺวา สตฺถา อุปริ เทสนํ วฑฺเฒนฺโต เตนหิ พฺราหฺมณาติอาทิมาห. ตตฺถ เตนหีติ การณนิทฺเทโส. ยสฺมา สงฺขิตฺเตน ภาสิตสฺส อตฺถํ อชานนฺโต วิตฺถารเทสนํ ยาจสิ, ตสฺมาติ อตฺโถ. เสสเมตฺถ อุตฺตานเมวาติ.

[๑๘] อฏฺฐเม อายสฺมาติ ปิยวจนเมตํ. อานนฺโทติ ตสฺส เถรสฺส นามํ. เอกํเสนาติ เอกนฺเตน. อนุวิจฺจาติ อนุปวิสิตฺวา. วิญฺญูติ ปณฺฑิตา. ครหนฺตีติ นินฺทนฺติ, อวณฺณํ ภาสนฺติ. เสสเมตฺถ อุตฺตานเมว. นวเม สพฺพํ อุตฺตานเมว.

@๔ ฉ.ม.,อิ. น ๕ ฉ.ม. อชานิตฺวา