5. Paṇḍitasuttavaṇṇanā

[45] Pañcame paṇḍitapaññattānīti paṇḍitehi paññattāni kathitāni pasatthāni. Sappurisapaññattānīti sappurisehi mahāpurisehi paññattāni kathitāni pasatthāni. Ahiṃsāti karuṇā ceva karuṇāpubbabhāgo ca. Saṃyamoti sīlasaṃyamo. Damoti indriyasaṃvaro, uposathavasena vā attadamanaṃ, puṇṇovāde damoti vuttā khantipi āḷavake vuttā paññāpi imasmiṃ sutte vaṭṭatiyeva. Mātāpituupaṭṭhānanti mātāpitūnaṃ rakkhanaṃ gopanaṃ paṭijagganaṃ. Santānanti aññattha buddhapaccekabuddhaariyasāvakā santo nāma, idha pana mātāpituupaṭṭhākā adhippetā. Tasmā uttamaṭṭhena santānaṃ, seṭṭhacariyaṭṭhena brahmacārīnaṃ. Idaṃ mātāpituupaṭṭhānaṃ sabbhi upaññattanti evamettha attho daṭṭhabbo. Sataṃ etāni ṭhānānīti santānaṃ uttamapurisānaṃ etāni ṭhānāni kāraṇāni. Ariyo dassanasampannoti idha imesaṃyeva tiṇṇaṃ ṭhānānaṃ karaṇena ariyo ceva dassanasampanno ca veditabbo, na buddhādayo na sotāpannā. Athavā sataṃ etāni ṭhānānīti mātupaṭṭhānaṃ pitupaṭṭhānanti etāni ṭhānāni santānaṃ uttamapurisānaṃ kāraṇānīti evaṃ mātāpituupaṭṭhānavasena imissā gāthāya attho veditabbo. Mātāpituupaṭṭhākoyeva hi idha "ariyo dassanasampanno"ti vutto. Sa lokaṃ bhajate sivanti so khemaṃ devalokaṃ gacchati 4-.

@2 saṃ.sa. 15/246/257 āḷavakasutta 3 cha.Ma. upaññātanti 4 cha.Ma. gacchatīti