7. Vacchagottasuttavaṇṇanā

[58] Sattame mahapphalanti mahāvipākaṃ. Dhammassa ca anudhammaṃ byākarontīti ettha dhammo nāma kathitakathā, anudhammo nāma kathitassa paṭikathanaṃ. Sahadhammikoti sakāraṇo sahetuko. Vādānupātoti vādassa anupāto, anupatanaṃ pavattīti attho.

Idaṃ vuttaṃ hoti:- bhotā gotamena vuttā sakāraṇā vādappavatti kiñcipi gārayhaṃ kāraṇaṃ na āgacchatīti. Athavā tehi parehi vuttā sakāraṇā vādappavatti kiñci gārayhakāraṇaṃ na āgacchatīti pucchati 1-.

Antarāyakaro hotīti antarāyaṃ vināsaṃ kiñci lomakaṃ vilomakaṃ karoti. Pāripanthikoti panthadūhanacoro. Khato ca hotīti guṇakhaṇanena khato hoti. Upahatoti guṇūpaghāteneva upahato.