14. Etadaggavagga

1. Paṭhamavagga

etadaggapadavaṇṇanā

[188] Etadaggesu paṭhamavaggassa paṭhame etadagganti etaṃ aggaṃ. Ettha ca ayaṃ aggasaddo ādikoṭikoṭṭhāsaseṭṭhesu dissati. "ajjatagge samma dovārika āvarāmi dvāraṃ nigaṇṭhānaṃ nigaṇṭhīnan"tiādīsu hi ādimhi dissati. "teneva aṅgulaggena taṃ aṅgulaggaṃ parāmaseyya, ucchuggaṃ veḷuggan"tiādīsu koṭiyaṃ. "ambilaggaṃ vā madhuraggaṃ vā tittaggaṃ vā, anujānāmi bhikkhave vihāraggena vā pariveṇaggena vā bhājetun"tiādīsu koṭṭhāse. "yāvatā bhikkhave sattā apadā vā .pe. Tathāgato tesaṃ aggamakkhāyatī"tiādīsu seṭṭhe. Svāyamidha koṭiyaṃpi vaṭṭati seṭṭhepi. Te hi therā attano attano seṭṭhaṭṭhāne koṭibhūtāti aggā seṭṭhabhūtātipi. Tasmā etadagganti esā koṭi eso seṭṭhoti ayamettha attho. Eseva nayo sabbasuttesu.