10. Dutiyanidānasuttavaṇṇanā

[113] Dasame kammānanti vaṭṭagāmikammānameva. Chandarāgaṭṭhāniyeti chandarāgassa kāraṇabhūte. Ārabbhāti āgamma sandhāya paṭicca. Chandoti taṇhācchando. Yo cetaso sārāgoti yo cittassa rāgo rajjanā rajjitattaṃ, etamahaṃ saṃyojanaṃ bandhanaṃ vadāmīti attho. Sukkapakkhe kammānanti vivaṭṭagāmikammānaṃ. Tadabhinivajjetīti taṃ abhinivajjeti. Yadā ṭhānena vipāko ñāto hoti vidito, tadā te ceva dhamme taṃ ca vipākaṃ abhinivajjeti. Imināva padena vipassanā kathitā, tadabhinivajjetvāti iminā maggo kathito, cetasā abhivirājetvāti iminā ca pana maggova. Paññāya ativijjha passatīti saha vipassanāya maggapaññāya nibbijjhitvā passati. Evaṃ sabbattha attho veditabbo. Imasmiṃ pana sutte vaṭṭavivaṭṭaṃ kathitanti.

Sambodhavaggo paṭhamo.