7. Sattamavagga

sujātāvatthu

[258] Upāsikāpāliyā paṭhame paṭhamaṃ saraṇaṃ gacchantīnanti sabbapaṭhamaṃ saraṇesu patiṭṭhitānaṃ upāsikānaṃ sujātā nāma seniyadhītā aggāti dasseti. Sāpi padumuttarabuddhakāle haṃsavatiyaṃ kulagehe nibbatti. Sā aparabhāge satthu dhammakathaṃ suṇantī satthāraṃ ekaṃ upāsikaṃ paṭhamaṃ saraṇaṃ gacchantīnaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi. Sā kappasatasahassaṃ devamanussesu saṃsaritvā amhākaṃ satthu nibbattito puretarameva uruvelāyaṃ senānigame seniyakuṭumbikassa gehe nibbattitvā vayappattā ekasmiṃ nigrodharukkhe paṭṭhanaṃ akāsi "sace samajātikaṃ kulagharaṃ gantvā paṭhamagabbhe puttaṃ labhissāmi, anusaṃvaccharaṃ balikammaṃ karissāmī"ti. Tassā sā paṭṭhanā samijjhi.

Sā mahāsattassa dukkarakārikaṃ karontassa chaṭṭhe vasse paripuṇṇe visākhapuṇṇamīdivase "pātova balikammaṃ karissāmī"ti rattiyā paccūsasamayaṃ paccuṭṭhāya dhenuyo duhāpesi. Vacchakā dhenūnaṃ thanamūlaṃ na agamaṃsu, thanamūle navabhājanamhi upanītamatte attanova dhammatāya khīradhārā pasaviṃsu. Taṃ acchariyaṃ disvā sujātā sahattheneva khīraṃ gaṇhitvā navabhājane pakkhipitvā sahattheneva aggiṃ katvā pacitumārabhi. Tasmiṃ pāyāse paccamāne mahantamahantā pubbuḷakā uṭṭhahitvā dakkhiṇāvaṭṭā hutvā sañcaranti, ekaphussitaṃpi bahi na gacchati. Mahābrahmā chattaṃ dhāreti, cattāro lokapālā khaggahatthā ārakkhaṃ gaṇhiṃsu, sakko alātāni samānento aggiṃ jālesi. Devatā catūsu dīpesu ojaṃ saṃharitvā tattha pakkhipiṃsu. Sujātā ekadivaseyeva imāni acchariyāni disvā puṇṇadāsiṃ āmantesi "amma puṇṇe ajja amhākaṃ devatā