4. Catutthavaggavaṇṇanā

[322] Catutthassa paṭhame jambūdīpeti jambuyā paññāto pākaṭo dīpoti jambūdīPo. Imassa kira dīpassa paññāṇabhūtā yojanasatubbedhā paṇṇāsayojanasākhā pañcadasayojanavaṭṭakkhandhā himavantapabbate jātā kappaṭṭhāyinī mahājambū nāma atthi, tāya ayaṃ dīpo jambūdīpoti vuccati. Yathā ca imasmiṃ dīpe jambūrukkho kappaṭṭhāyi, tathā amaragoyāne kadambarukkho, uttarakurūsu kapparukkho, pubbavidehe sirīsarukkho, asurānaṃ cittapātalī, supaṇṇānaṃ simbalirukkho, devānaṃ pāricchattakoti imepi kappaṭṭhāyinova.

Pātalī simbalī jambū devānaṃ pārichattako

kadambo kapparukkho ca sirīsena bhavati sattamanti.