3. Tatiyapaṇṇāsaka

11. 1. Āsāduppajahavaggavaṇṇanā

[119] Tatiyapaṇṇāsakassa paṭhame āsāti taṇhā. Duppajahāti duccajā dunnīharā lābhāsāya duppajahabhāvena sattā dasapi vassāni vīsatipi saṭṭhīpi vassāni "ajja labhissāma, sve labhissāmā"ti rājānaṃ upaṭṭhahanti, kasikammādīni karonti, ubhato byūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi "dānaṃ dehi, pūjaṃ karohī"ti anukampakehi vuccamāno "nāhaṃ marissāmi"ccevaṃ āsāya kassaci vacanaṃ na gaṇhāti.

[120] Dutiye pubbakārīti paṭhamaṃ upakārassa kārako. Kataññū katavedīti tena kataṃ ñatvā pacchā kārako. Tesu pubbakārī "iṇaṃ demī"ti saññaṃ karoti, pacchā kārako "iṇaṃ jīrāpemī"ti saññaṃ karoti.