5. Vajirūpamasuttavaṇṇanā

[25] Pañcame arukūpamacittoti purāṇavaṇasadisacitto. Vijjūpamacittoti ittarakālobhāsanena vijjūpamasadisacitto. Vajirūpamacittoti kilesānaṃ mūlaghātakaraṇa- samatthatāya vajirena sadisacitto. Abhisajjatīti lagati. Kuppatīti kopavasena kuppati. Byāpajjatīti pakatibhāvaṃ pajahati, pūtiko hoti. Paṭitthīyatīti thinabhāvaṃ thaddhabhāvaṃ āpajjati. Kopanti dubbalakodhaṃ. Dosanti dussanavasena tato balavataraṃ. Appaccayanti atuṭṭhākāraṃ domanassaṃ. Duṭṭhārukoti purāṇavaṇo. Kaṭṭhenāti daṇḍakakoṭiyā. Kathalenāti kapālena. Āsavaṃ detīti aparāparaṃ savati. Purāṇavaṇehi attano dhammatāyayeva pubbalohitaṃ yūsanti imāni tīṇi savati, ghaṭṭito pana tāni adhikataraṃ savati.

Evameva khoti ettha idaṃ opammasaṃsandanaṃ:- duṭṭhāruko viya hi kodhanapuggalo, tassa attano dhammatāya savanaṃ viya kodhanassa attano dhammatāya uddhumātassa viya caṇḍikatassa caraṇaṃ, kaṭṭhena vā kathalāya vā ghaṭṭanaṃ viya appamattakaṃ vacanaṃ, bhiyyoso mattāya savanaṃ viya "mādisannāma esa evaṃ vadatī"ti bhiyyoso mattāya uddhumāyanabhāvo daṭṭhabbo.

Rattandhakāratimisāyanti rattiṃ cakkhuviññāṇuppattinivāraṇaandhabhāvakaraṇena bahalatameva. Vijjantarikāyāti vijjuppavattikkhaṇe. Idhāpi idaṃ opammasaṃsandanaṃ:- cakkhumā puriso viya hi yogāvacaro daṭṭhabbo, andhakāraṃ viya sotāpattimaggavajjhā kilesā, vijjusañcaraṇaṃ viya sotāpattimaggañāṇassa uppattikālo, vijjantarikāya