anulomakkhantiṃ laddhāna modatī tidivaṃ gato.

Upaghātakaṃ pana sayaṃ kusalampi akusalampi samānaṃ aññaṃ dubbalakammaṃ ghātetvā tassa vipākaṃ paṭibāhitvā attano vipākassa okāsaṃ karoti. Evaṃ pana kammena kate okāse taṃ vipākaṃ uppannaṃ nāma vuccati. Upacchedakantipi etasseva nāmaṃ.

Akusalakammassāpi vipaccanakāle ekaṃ kusalakammaṃ uṭṭhāya taṃ kammaṃ chinditvā pāteti. Idaṃ upacchedakaṃ nāma. Tattha ajātasattuno kammaṃ kusalacchedakaṃ ahosi, aṅgulimālattherassa akusalacchedakanti. Evaṃ suttantikapariyāyena ekādasa kammāni vibhattāni.

Abhidhammapariyāyena ca soḷasa kammāni vibhattāni, seyyathīdaṃ:- "atthekaccāni pāpakāni kammasamādānāni gatisampattiṃ paṭibāḷhāni na vipaccanti, atthekaccāni pāpakāni kammasamādānāni upadhisampattiṃ paṭibāḷhāni na vipaccanti, atthekaccāni pāpakāni kammasamādānāni kālasampattiṃ paṭibāḷhāni na vipaccanti, atthekaccāni pāpakāni kammasamādānāni payogasampattiṃ paṭibāḷhāni na vipaccanti. Atthekaccāni pāpakāni kammasamādānāni gativipattiṃ āgamma vipaccanti, upadhivipattiṃ, kālavipattiṃ payogavipattiṃ āgamma vipaccanti. Atthekaccāni kalyāṇāni kammasamādānāni gativipattiṃ paṭibāḷhāni na vipaccanti, upadhivipattiṃ, kālavipattiṃ, payogavipattiṃ paṭibāḷhāni na vipaccanti. Atthekaccāni kalyāṇāni kammasamādānāni gatisampattiṃ āgamma vipaccanti, upadhisampattiṃ, kālasampattiṃ, payogasampattiṃ āgamma vipaccantī"ti 1-.