Tattha pāpakānīti lāmakāni. Kammasamādānānīti kammagahaṇāni. Gahitasamādinnānaṃ kammānametaṃ adhivacanaṃ. Gatisampattiṃ paṭibāḷhāni na vipaccantītiādīsu aniṭṭhārammaṇānubhavanarase kamme vijjamāneyeva sugatibhave nibbattassa taṃ kammaṃ gatisampattiṃ paṭibāḷhaṃ na vipaccati nāma. Gatisampattiyā paṭibāhitaṃ hutvā na vipaccatīti attho. Yo pana pāpakammena dāsiyā vā kammakāriniyā vā kucchiyaṃ nibbattitvā upadhisampanno hoti, attabhāvasamiddhiyaṃ tiṭṭhati. Athassa sāmikā taṃ rūpasampattiṃ disvā "nāyaṃ kiliṭṭhakammassa anucchaviko"ti uppādetvā attanova

Evarūpassa kammaṃ upadhisampattiṃ paṭibāḷhaṃ na vipaccati nāma. Yo pana paṭhamakappikakālasadise sulabhasampannarasabhojane subhikkhakāle nibbattati, tassa vijjamānampi pāpakammaṃ kālasampattiṃ paṭibāḷhaṃ na vipaccati nāma. Yo pana sammāpayogaṃ nissāya jīvati, upasaṅkamitabbayuttakāle upasaṅkamati, paṭikkamitabbayuttakāle paṭikkamati, palāyitabbayuttakāle palāyati. Lañcadānayuttakāle lañcaṃ deti, corikayuttakāle corikaṃ karoti. Evarūpassa pāpakammaṃ payogasampattiṃ paṭibāḷhaṃ na vipaccati nāma.

Duggatibhave nibbattassa pana pāpakammaṃ gativipattiṃ āgamma vipaccati nāma. Yo pana dāsiyā vā kammakāriniyā vā kucchismiṃ nibbatto dubbaṇṇo hoti dussaṇṭhāno, "yakkho nu kho manusso nu kho"ti vimatiṃ uppādeti. So ce puriso hoti, atha naṃ "nāyaṃ aññassa kammassa anucchaviko"ti hatthiṃ vā rakkhāpenti assaṃ vā goṇaṃ vā tiṇakaṭṭhādīni vā āharāpenti, kheḷasarakaṃ vā gaṇhāpenti. Sace itthī hoti, atha naṃ hatthīassādīnaṃ bhattamāsādīni vā pacāpenti, kacavaraṃ vā chaḍḍāpenti, aññaṃ vā pana jigucchanīyaṃ kammaṃ kārenti. Evarūpassa pāpakammaṃ upadhivipattiṃ āgamma vipaccati nāma. Yo pana dubbhikkhakāle vā parihīnasampattikāle vā antarakappe vā nibbattati, tassa pāpakammaṃ kālavipattiṃ āgamma vipaccati