Tayo pāsādā ahesunti bodhisatte kira soḷasavassuddesike jāte suddhodana- rājā "puttassa vasanakapāsāde kāressāmī"ti vaḍḍhakino sannipātāpetvā bhaddakena nakkhattamuhuttena navabhūmikataparikammaṃ kāretvā tayo pāsāde kārāpesi. Te sandhāyetaṃ vuttaṃ. Hemantikotiādīsu yattha sukhaṃ hemante vasituṃ, ayaṃ hemanti koti. Itaresupi eseva nayo. Ayaṃ panettha vacanattho:- hemante vāso hemanto, hemantaṃ arahatīti hemantiko. Itaresupi eseva nayo.

Tattha hemantiko pāsādo navabhūmiko ahosi, bhūmiyo panassa uṇhautugāhāpanatthāya nīcanīcā ahesuṃ. Tattha dvāravātapānāni suphusitakavāṭāni ahesuṃ nibbivarāni. Cittakammampi karontā tattha tattha pajjalite aggikkhandheyeva akaṃsu. Bhummattharaṇaṃ panettha kambalamayaṃ. Tathā sāṇivitānanivāsanapārupanaveṭhanāni. vātapānāni uṇhaggāhāpanatthaṃ divā vivaṭāni rattiṃ pihitāni honti.

Gimhiko pañcabhūmiko ahosi. Sītautuggāhāpanatthaṃ panettha bhūmiyo uccā asambādhā ahesuṃ. Dvāravātapānāni nātisuphusitāni savivarāni sajālāni ahesuṃ. Cittakamme uppalāni padumāni puṇḍarikāniyeva akaṃsu. Bhummattharaṇaṃ panettha dukkūlamayaṃ, tathā sāṇivitānanivāsanapārupanaveṭhanāni. Vātapānasamīpesu cettha nava cāṭiyo ṭhapetvā udakassa pūretvā nīluppalādīhi sañchādenti. Tesu tesu padesesu udakayantāni karonti, yehi deve vassante viya udakadhārā nikkhamanti. Antopāsāde tattha tattha kalalapūrā doṇiyo ṭhapetvā pañcavaṇṇāni padumāni ropayiṃsu. Pāsāda- matthake sukkhamahiṃsacammaṃ bandhitvā yantehi parivaṭṭetvā yāva chadanapiṭṭhiyā pāsāṇe āropetvā yehi deve vassante viya udakadhārā nikkhamanti. Saddo meghagajjitaṃ viya hoti. Dvāravātapānāni panettha divā pihitāni honti rattiṃ vivaṭāni.