Evaṃ niṭṭhitesu pāsādesu rājā cintesi "putto me vayappatto, chattamassa ussāpetvā rajjasiriṃ passissāmī"ti. So sākiyānaṃ paṇṇāni pahiṇi "putto me vayappatto, rajje naṃ patiṭṭhāpessāmi, sabbe attano attano gehesu dārikā imaṃ gehaṃ pesentū"ti. Te sāsanaṃ sutvā "kumāro kevalaṃ dassanakkhamo rūpasampanno, na kiñci sippaṃ jānāti, dārabharaṇaṃ kātuṃ na sakkhissati, na mayaṃ dhītaro dassāmā"ti āhaṃsu. Rājā taṃ pavuttiṃ sutvā puttassa santikaṃ gantvā ārocesi. Bodhisatto "kiṃ sippaṃ dassetuṃ vaṭṭati tātā"ti āha. sahassathāmadhanuṃ āropetuṃ vaṭṭati tātāti. Tenahi āharāpethāti. Rājā āharāpetvā adāsi. Dhanuṃ purisasahassaṃ āropeti, purisasahassaṃ oropeti. Mahāpuriso dhanuṃ āharāpetvā pallaṅke nisinnova jiyaṃ pādaṅguṭṭhake veṭhetvā kaḍḍhanto pādaṅguṭṭhakeneva dhanuṃ āropetvā vāmena hatthena daṇḍaṃ gahetvā dakkhiṇena hatthena kaḍḍhitvā jiyaṃ poṭhesi. Sakalanagaraṃ uppatanākārappattaṃ ahosi. "kiṃ saddo eso"ti ca vutte "devo gajjatī"ti āhaṃsu. Athaññe "tumhe na jānātha, na devo gajjati, aṅgīrasassa kumārassa sahassathāmadhanuṃ āropetvā jiyaṃ poṭhentassa jiyappahārasaddo eso"ti āhaṃsu. Sākiyā tāvattakeneva āraddhacittā ahesuṃ.

@dvāravātapānā rattiṃ vivaṭā divā pihitā, ekacce divā vivaṭā rattiṃ pihitā

@4 cha.Ma.,i. daṇḍe