Mahāpuriso "aññaṃ kiṃ kātuṃ vaṭṭatī"ti āha. Aṭṭhaṅgulamattaṃ bahalaṃ ayopaṭṭaṃ kaṇḍena vinivijjhituṃ vaṭṭatīti. Taṃ vinivijjhitvā "aññaṃ kiṃ kātuṃ vaṭṭatī"ti āha. Caturaṅgulabahalaṃ asanaphalakaṃ vinivijjhituṃ vaṭṭatīti. Taṃ vinivijjhitvā "aññaṃ kiṃ kātuṃ vaṭṭatī"ti āha. Vidatthibahalaṃ udumbaraphalakaṃ vinivijjhituṃ vaṭṭatīti. Taṃ vinivijjhitvā "aññaṃ kiṃ kātuṃ vaṭṭatī"ti āha. Yante baddhaṃ phalakasataṃ vinivijjhituṃ vaṭṭatīti. Tampi vinivijjhitvā "aññaṃ kiṃ kātuṃ vaṭṭatī"ti āha. Saṭṭhipatalaṃ sukkhamahisacammaṃ vinivijjhituṃ vaṭṭatīti. Tampi vinivijjhitvā "aññaṃ kiṃ kātuṃ vaṭṭatī"ti āha. Tato vālikāsakaṭādīni ācikkhiṃsu. Mahāsatto vālikāsakaṭampi palālasakaṭampi vinivijjhitvā udake ekūsabhappamāṇaṃ kaṇḍaṃ pesesi, thale aṭṭha- usabhappamāṇe 1-. Atha naṃ "idāni vātiṅgaṇasaññāya vālaṃ vijjhituṃ vaṭṭatī"ti āhaṃsu. Tenahi bandhāpethāti. Saddantare bajjhatu tātāti purato gacchantu, gāvutantare bandhantūti. Purato gacchantu, aḍḍhayojane bandhantūti, purato gacchantu, yojane bandhantūti bandhāpetha tātāti. Yojanamatthake vātiṅgaṇasaññāya vālaṃ bandhāpetvā rattandhakāre meghapatalasañchannāsu disāsu kaṇḍaṃ khipi, kaṇḍo gantvā yojanamatthake vālaṃ phāletvā paṭhaviṃ pāvisi. Na kevalañca ettakameva, taṃ divasaṃ pana mahāsatto loke vattamāne sippaṃ sabbameva sandassesi. Sakyarājāno attano attano dhītaro alaṅkaritvā pesayiṃsu, cattāḷīsasahassā nāṭakitthiyo ahesuṃ. Mahāpuriso tīsu pāsādesu devo maññe paricārento mahāsampattiṃ anubhavati.
Nippurisehīti purisavirahitehi. Na kevalañcettha turiyāneva nippurisāni, sabbaṭṭhānānipi nippurisāneva. Dovārikāpi itthiyova, nhāpanādiparikammakarā itthiyova. Rājā kira "tathārūpaṃ issariyasukhasampattiṃ anubhavamānassa purisaṃ disvā parisaṅkā uppajjati, sā me puttassa mā ahosī"ti sabbakiccesu itthiyova ṭhapesi. Paricārayamānoti modamāno. Na heṭṭhāpāsādaṃ orohāmīti pāsādato heṭṭhā na otarāmi. Iti maṃ cattāro māse añño sikhābaddho puriso nāma passituṃ