"paṭisambhidā vimokkhā ca yā ca sāvakapāramī

paccekabodhi buddhabhūmi sabbametena labbhatī"ti. Imasmiṃ suttadvaye ca vaṭṭavivaṭṭaṃ kathitaṃ.

[43] Tatiye paduṭṭhacittanti dosena paduṭṭhacittaṃ. Cetasā ceto pariccāti attano cittena tassa cittaṃ paricchinditvā. Yathābhataṃ nikkhittoti yathā āharitvā ṭhapito. Evaṃ nirayeti evaṃ niraye ṭhitoyevāti daṭṭhabbo.

Apāyantiādi sabbaṃ nirayavevacanametaṃ. Nirayo hi ayasaṅkhātā sukhā apetoti apāyo, dukkhassa gati paṭisaraṇanti duggati, dukkaṭakārino ettha vivasā nipatantīti vinipāto, nirassādaṭṭhena nirayo.