Dīghavāpiyampi "mahājātakabhāṇakatthero gāthāsahassaṃ mahāvessantaraṃ kathessatī"ti mahāgāme tissamahāvihāravāsī eko daharo sutvā tato nikkhamitvā ekāheneva yojanamaggaṃ āgato. Tasmiṃyeva khaṇe thero dhammakathaṃ ārabhi. Daharo dūramaggāgamanena sañjātakāyadarathattā paṭṭhānagāthāya saddhiṃ avasānagāthaṃyeva vavatthapesi. Tato therassa "idamavocā"ti vatvā uṭṭhāya gamanakāle "mayhaṃ āgamanakammaṃ moghaṃ jātan"ti rodamāno aṭṭhāsi. Eko manusso taṃ kathaṃ sutvā gantvā therassa ārocesi "bhante `tumhākaṃ dhammakathaṃ sossāmī'ti eko daharabhikkhu tissamahāvihārā āgato, so `kāyadarathabhāvena me āgamanaṃ moghaṃ jātan'ti rodamāno ṭhito"ti. Gacchatha saññāpetha taṃ "puna sve kathessāmā"ti. So punadivase therassa dhammakathaṃ sutvā sotāpattiphalaṃ pāpuṇi.
@3 khu.jā. 28/1045/365 vessantarajātaka (syā) 4 Sī.,i. ekadivaseneva
Aparāpi ullaṅgakolikaṇṇivāsikā ekā itthī puttakaṃ pāyamānā "dīghabhāṇakamahāabhayatthero nāma ariyavaṃsapaṭipadaṃ kathetī"ti sutvā pañcayojanamaggaṃ gantvā divākathikattherassa nisinnakāleyeva vihāraṃ pavisitvā bhūmiyaṃ puttaṃ nipajjāpetvā divākathikattherassa ṭhitakāva dhammaṃ assosi. Padabhāṇakampi ṭhitakāva assosi, padabhāṇakatthere uṭṭhite dīghabhāṇakamahāthero catupaccayasantosabhāvanārāmamahāariyavaṃsaṃ ārabhi. Sā ṭhitakāva paggaṇhāti. Thero tayo paccaye kathetvā uṭṭhānākāraṃ akāsi. Sā upāsikā āha "ayyā `ariyavaṃsaṃ kathessāmā"ti siniddhabhojanaṃ bhuñjitvā madhurapānakaṃ pivitvā yaṭṭhimadhukatelādibhesajjaṃ katvā kathetuṃ yuttaṭṭhāneyeva uṭṭhahantī"ti. Thero "sādhu bhaginī"ti vatvā upari bhāvanārāmaṃ paṭṭhapesi. Aruṇuggamanañca therassa "idamavocā"ti vacanañca upāsikāya sotāpattiphaluppatti ca ekakkhaṇeyeva ahosi.