7. Saṅkhatalakkhaṇasuttavaṇṇanā

[47] Sattame saṅkhatassāti paccayehi samāgantvā katassa. Saṅkhatalakkhaṇānīti saṅkhataṃ etanti sañjānanakāraṇanimittāni. Uppādoti jāti. Vayoti bhedo. Ṭhitassa aññathattaṃ nāma jaRā. Tattha saṅkhatanti tebhūmikā dhammā. Maggaphalāni pana asammasanūpagattā idha na kathiyanti. Uppādādayo saṅkhatalakkhaṇā nāma. Tesu uppādakkhaṇe uppādo, ṭhānakkhaṇe jarā, bhaṅgakkhaṇe vayo. Lakkhaṇaṃ na saṅkhataṃ, saṅkhataṃ na lakkhaṇaṃ, lakkhaṇena pana saṅkhataṃ paricchinnaṃ. Yathā hatthiassagoṇamahiṃsādīnaṃ sattisūlādīni sañjānanalakkhaṇāni na hatthīādayo, napi hatthiādayo lakkhaṇāneva, lakkhaṇehi pana te "asukassa hatthī, asukassa asso, asukahatthī, asukaasso"ti vā paññāyanti, evaṃ sampadamidaṃ veditabbaṃ.