Appaṭṭhatarāti yattha bahūhi veyyāvaccakaraṇehi upakaraṇehi vā attho natthi. Appasamārambhatarāti yattha bahunnaṃ kammacchedavasena pīḷāsaṅkhāto samārambho natthi. Seyyathāpi bhavaṃ gotamo bhavañcānando, ete me pujjāti yathā bhavaṃ gotamo bhavañca ānando, evarūpā mama pūjitā, tumheyeva dve janā mayhaṃ pujjā ca pāsaṃsā cāti imamatthaṃ sandhāyeva taṃ vadati. Tassa kira evaṃ ahosi "ānandatthero maṃyeva imaṃ pañhaṃ kathāpetukāmo, attano kho pana vaṇṇe vutte atussanako nāma natthī"ti. Tasmā pañhaṃ kathetukāmo vaṇṇabhaṇanena vikkhepaṃ karonto evamāha.

Na kho tyāhanti na kho te ahaṃ. Theropi kira cintesi "ayaṃ brāhmaṇo pañhaṃ kathetukāmo parivattati, imaṃ pañhaṃ etaṃyeva kathāpessāmī"ti. Tasmā naṃ evamāha.

Sahadhammikanti sakāraṇaṃ. Saṃsādetīti saṃsīdāpeti. No vissajjetīti na katheti. Yannūnāhaṃ parimoceyyanti yannūna ahaṃ ubhopete vihesato parimoceyyaṃ. Brāhmaṇo hi ānandena pucchitaṃ pañhaṃ akathento vihesati, ānandopi brāhmaṇaṃ akathentaṃ kathāpento. Iti ubhopete vihesato mocessāmīti cintetvā evamāha. Kānujjāti kā nu ajja. Antarākathā udapādīti aññissā kathāya antarantare katarā kathā uppajjīti pucchati. Tadā kira rājantepure tīṇi pāṭihāriyāni ārabbha kathā udapādīti, taṃ pucchāmīti sutvā evamāha. Atha brāhmaṇo "idāni vattuṃ sakkhissāmī"ti rājantepure uppannaṃ kathaṃ āropento ayaṃ khvajja bho gotamāti- ādimāha. Tattha ayaṃ khvajjāti ayaṃ kho ajja. Pubbe sudanti ettha sudanti nipātamattaṃ. Uttarimanussadhammāti dasakusalakammapathasaṅkhātā manussadhammā uttari. Iddhipāṭihāriyaṃ dassesunti bhikkhācāraṃ gacchantā ākāseneva gamiṃsu ceva āgamiṃsu cāti evaṃ pubbe pavattaṃ ākāsagamanaṃ sandhāyevamāha. Etarahi pana bahutarā