@evamuparipi 4 cha.Ma.,i. viheseti 5 Ma. antepure 6 cha.Ma.,i. udapādi

@7 cha.Ma.,i. satthā Ca bhikkhūti idaṃ so brāhmaṇo "pubbe bhikkhū `cattāro paccaye uppādessāmī'ti maññe evamakaṃsu, idāni paccayānaṃ uppannabhāvaṃ ñatvā mohena ceva pamādena ca vītināmentī"ti laddhiyā evamāha.

Pāṭihāriyānīti paccanīkapaṭiharaṇavasena pāṭihāriyāni. Iddhipāṭihāriyanti ijjhanavasena iddhi, paṭiharaṇavasena pāṭihāriyaṃ, iddhiyeva pāṭihāriyaṃ iddhipāṭihāriyaṃ. Itaresupi eseva nayo. Anekavihitaṃ iddhividhantiādīnaṃ attho ceva bhāvanānayo ca visuddhimagge vitthāritova.

Nimittena ādisatīti āgatanimittena vā gatanimittena vā ṭhitanimittena vā "idaṃ nāma bhavissatī"ti katheti. Tatridaṃ vatthu:- eko kira rājā tisso muttā gahetvā purohitaṃ pucchi "kiṃ me ācariya hatthe"ti. So ito cito ca olokesi, tena ca samayena ekā sarabū "makkhikaṃ gahessāmī"ti pakkhantā, gahaṇakāle makkhikā palātā. So makkhikāya muttattā "muttā mahārājā"ti āha. Muttā tāva hontu, kati muttāti. So puna nimittaṃ olokesi. Avidūre kukkuṭo tikkhattuṃ saddaṃ nicchāresi. Brāhmaṇo "tisso mahārājā"ti āha. Evaṃ ekacco āgatanimittena katheti. Etenupāyena gataṭṭhitanimittehipi kathanaṃ veditabbaṃ. Evampi te manoti evaṃ tava mano somanassito vā domanassito vā kāmavitakkādisaṃyutto vāti. Dutiyaṃ tasseva vevacanaṃ. Itipi te cittanti itipi tava cittaṃ, imañca imañca atthaṃ cintayamānaṃ pavattanti attho. Bahuñcepi ādisatīti bahuñcepi katheti. Tatheva taṃ hotīti yathā kathitaṃ, tatheva hoti.