Tatrimāni vatthūni:- eko kira manusso "aṭṭaṃ karissāmī"ti gāmato nagaraṃ gacchanto nikkhantaṭṭhānato paṭṭhāya "vinicchayasabhāyaṃ rañño ca rājamahāmattānañca idaṃ kathessāmi idaṃ kathessāmī"ti vitakkento rājakulaṃ gato viya rañño purato ṭhito viya aṭṭakārakena saddhiṃ kathento viya ca ahosi, tassa taṃ vitakkavipphāravasena niccharantaṃ saddaṃ sutvā eko puriso "kenatthena āgacchasī"ti āha. Aṭṭakammenāti. Gaccha, jayo te bhavissatīti. So gantvā aṭṭaṃ katvā jayameva pāpuṇi.

Aparopi thero poliyavāsī gāme piṇḍāya vicari. Atha naṃ nikkhantaṃ ekā dārikā aññāvihitā na addasa. So gāmadvāre ṭhatvā nivattitvā oloketvā taṃ disvā vitakkayanto agamāsi. Gacchantoyeva ca "kiṃ nu kho kurumānā dārikā na addasā"ti vacībhedaṃ akāsi. Passe ṭhito eko puriso sutvā "tumhe bhante poliyagāme caritthā"ti āha.

Manosaṅkhārā paṇihitāti cittasaṅkhārā suṭṭhapitā. Vitakkessatīti vitakkayissati pavattayissatīti pajānāti. Pajānanto ca āgamaneneva pajānāti, pubbabhāgena jānāti, antosamāpattiyaṃ cittaṃ apaloketvā jānāti. Āgamanena jānāti nāma kasiṇaparikammakāleyeva "yenākāreneva kasiṇabhāvanaṃ āraddho paṭhamajjhānaṃ vā .pe. Catutthajjhānaṃ vā aṭṭha vā samāpattiyo nibbattessatī"ti jānāti. Pubbabhāgena jānāti nāma samathavipassanāya āraddhāyeva jānāti, "yenākārena esa vipassanaṃ āraddho sotāpattimaggaṃ vā nibbattessati .pe. Arahattamaggaṃ vā