9. 4. Samaṇavagga

1. Samaṇasuttavaṇṇanā

[82] Catutthassa paṭhame samaṇassāti samaṇassa santakāni. Samaṇakaraṇīyānīti samaṇena kattabbakiccāni. Adhisīlasikkhāsamādānantiādīsu samādānaṃ vuccati gahaṇaṃ. Adhisīlasikkhāya samādānaṃ gahaṇaṃ pūraṇaṃ adhisīlasikkhāsamādānaṃ. Sesapadadvayesupi eseva nayo. Ettha ca sīlaṃ adhisīlaṃ, cittaṃ adhicittaṃ, paññā adhipaññāti ayaṃ vibhāgo veditabbo. Tattha pañcasīlaṃ sīlaṃ nāma, taṃ upādāya dasasīlaṃ adhisīlaṃ nāma, taṃ upādāya catupārisuddhisīlaṃ adhisīlaṃ nāma. Apica sabbaṃpi lokiyaṃ sīlaṃ sīlameva, lokuttaraṃ sīlaṃ adhisīlaṃ, tadeva sikkhitabbato sikkhāti vuccati, kāmāvacaracittaṃ pana cittaṃ nāma,