So bhagavantaṃ abhivādetvā padakkhiṇaṃ katvā sakanivesanaṃ gantvā sabbarattiṃ buddhānaṃ nisajjanaṭṭhānaṃ gandhamālādāmādīhi alaṅkaritvā paṇītaṃ khādanīyaṃ bhojanīyaṃ paṭiyādāpetvā tassā rattiyā accayena sakanivesane bhikkhusatasahassaparivārassa bhagavato vicittayāgukhajjakaparivāraṃ nānārasasūpabyañjanagandhasālibhojanaṃ datvā bhattakiccapariyosāne ticīvarassa pahonake vatthayuge tathāgatassa pādamūle ṭhapetvā cintesi

So teneva niyāmena sattadivasāni mahādānaṃ datvā bhattakiccapariyosāne dussakoṭṭhāgāraṃ vivarāpetvā uttamaṃ sukhumavatthaṃ buddhānaṃ pādamūle ṭhapetvā bhikkhusatasahassaṃ ticīvarena acchādetvā tathāgataṃ upasaṅkamitvā "bhante yo tumhehi ito sattadivasamatthake bhikkhu etadagge ṭhapito, ahaṃpi so bhikkhu viya anāgate uppajjanakabuddhassa sāsane pabbajitvā paṭhamaṃ paṭivijjhituṃ samattho bhaveyyan"ti vatvā satthu pādamūle sīsaṃ katvā nipajji.

Satthā tassa vacanaṃ sutvā "iminā kulaputtena mahāadhikāro kato, samijjhissati nu kho etassa ayaṃ patthanā no"ti anāgataṃsañāṇaṃ pesetvā āvajjento samijjhanabhāvaṃ passi. Buddhānaṃ hi atītaṃ vā anāgataṃ vā paccuppannaṃ vā ārabbha āvajjentānaṃ āvaraṇaṃ nāma natthi, anekakappakoṭisatasahassantarampi atītaṃ vā anāgataṃ vā cakkavāḷasatasahassantarampi paccuppannaṃ vā āvajjanapaṭibaddhameva manasikārapaṭibaddhameva hoti. Evaṃ appaṭivattiyena ñāṇena so bhagavā idaṃ addasa "anāgate satasahassakappapariyosāne gotamo nāma buddho loke uppajjissati, tadā imassa paṭṭhanā samijjhissatī"ti. Atha naṃ evamāha "ambho kulaputta anāgate satasahassakappapariyosāne gotamo nāma buddho loke uppajjissati, tvaṃ tassa paṭhamameva dhammadesanāya tiparivaṭṭadhammacakkappavattanasuttantapariyosāne aṭṭhārasahi brahmakoṭīhi saddhiṃ sahassanayasampanne sotāpattiphale patiṭṭhahissasī"ti.