@4 cha.Ma. paññattāsanesu Dakkhiṇodakaṃ datvā paṇītabhojanena parivisitvā bhattakiccapariyosāne buddhappamukhaṃ bhikkhusaṃghaṃ mahārahehi vatthehi acchādetvā "bhante nāyaṃ ārambho appamatta- kaṭṭhānatthāya, imināva niyāmena sattāhaṃ anukampaṃ karohī"ti āha. Satthā adhivāsesi. So teneva niyāmena sattāhaṃ mahādānaṃ pavattetvā bhagavantaṃ vanditvā añjaliṃ paggahetvā ṭhito āha "bhante mama sahāyo saradatāpaso yassa satthuno aggasāvako homīti paṭṭhesi, ahaṃ tasseva dutiyasāvako bhavāmī"ti.

Satthā anāgataṃ oloketvā tassa paṭṭhanāya samijjhanabhāvaṃ disvā byākāsi "tvaṃ ito kappasatasahassādhikaṃ asaṅkhyeyyaṃ atikkamitvā gotamabuddhassa dutiyasāvako bhavissasī"ti. Buddhānaṃ byākaraṇaṃ sutvā sirivaḍḍho haṭṭhapahaṭṭho ahosi. Satthāpi bhattānumodanaṃ katvā saparivāro vihārameva gato. Sirivaḍḍho tato paṭṭhāya yāvajīvaṃ kalyāṇakammaṃ katvā dutiyacittavāre kāmāvacaradevaloke nibbatto. Saradatāpaso cattāro brahmavihāre bhāvetvā brahmaloke nibbatto.

Tato paṭṭhāya imesaṃ ubhinnaṃpi antarākammaṃ na kathitaṃ. Amhākaṃ pana buddhassa nibbattito puretarameva saradatāpaso rājagahanagarassa avidūre upatissagāme sāribrāhmaṇiyā kucchismiṃ paṭisandhiṃ gaṇhi. Taṃdivasameva cassa sahāyopi rājagahasseva avidūre kolitagāme moggallibrāhmaṇiyā kucchismiṃ paṭisandhiṃ gaṇhi. Tāni kira dvepi kulāni yāva sattamā kulaparivaṭṭā ābaddhapaṭibaddhasahāyakāneva. Tesaṃ dvinnaṃpi ekadivasameva gabbhaparihāraṃ adaṃsu. Dasamāsaccayena jātānaṃpi tesaṃ chasaṭṭhī dhātiyo upanayiṃsu. Nāmagahaṇadivase sāribrāhmaṇiyā puttassa upatissagāme jeṭṭhakulassa puttattā upatissoti nāmaṃ akaṃsu, itarassa kolitagāme jeṭṭhakulassa puttattā kolitoti nāmaṃ akaṃsu. Te ubhopi vuḍḍhimanvāya sabbasippānaṃ pāraṃ agamaṃsu.