Upatissamāṇavassa kīḷanatthāya nadiṃ vā uyyānaṃ vā pabbataṃ vā gamanakāle pañca suvaṇṇasivikāsatāni parivārāni honti, kolitamāṇavassa pañca ājaññarathasatāni. Dvepi janā pañcapañcamāṇavakasataparivārā honti. Rājagahe ca anusaṃvaccharaṃ giraggasamajjaṃ nāma hoti, tesaṃ dvinnampi ekaṭṭhāneyeva mañce bandhanti. Dvepi janā ekatova nisīditvā samajjaṃ passantā hasitabbaṭṭhāne hasanti, saṃvegaṭṭhāne saṃvejanti, dāyaṃ dātuṃ yuttaṭṭhāne dāyaṃ denti. Tesaṃ imināva niyāmena ekadivasaṃ samajjaṃ passantānaṃ paripākagatattā ñāṇassa purimadivase viya hasitabbaṭṭhāne hāso vā saṃvegaṭṭhāne saṃvejanaṃ vā dāyaṃ dātuṃ yuttaṭṭhāne dāyaṃ vā nāhosi. Dvepi pana janā evaṃ cintayiṃsu "kiṃ ettha oloketabbaṃ atthi, sabbepime appatte vassasate apaṇṇattikabhāvaṃ gamissanti. Amhehi pana ekaṃ mokkhadhammaṃ gavesituṃ vaṭṭatī"ti āramamaṇaṃ gahetvā nisīdiṃsu.
Tato kolito upatissaṃ āha "samma upatissa na tvaṃ aññesu divasesu viya haṭṭhapahaṭṭho, anattamanadhātuko ahosi, kiṃ te sallakkhitan"ti. Samma kolita `etesaṃ olokane sāro natthi, niratthametaṃ, attano mokkhadhammaṃ gavesituṃ vaṭṭatī'ti imaṃ cintayanto nisinnomhi, tvaṃ pana kasmā anattamano ahosīti. Sopi tatheva āha. Athassa attanā saddhiṃ ekajjhāsayataṃ ñatvā upatisso taṃ evamāha "amhākaṃ ubhinnaṃpi cintitaṃ sucintitaṃ, mokkhadhammaṃ gavesantehi ekaṃ pabbajjaṃ laddhuṃ vaṭṭati, kassa santike pabbajāmā"ti.
Tena kho pana samayena sañjayo paribbājako rājagahe paṭivasati mahatiyā paribbājakaparisāya saddhiṃ. Te "tassa santike pabbajissāmā"ti pañcahi māṇavakasatehi saddhiṃ sañjayassa santike pabbajiṃsu. Tesaṃ pabbajitakālato paṭṭhāya sañjayo atirekalābhaggayasaggappatto ahosi. Te katipāheneva sabbaṃ sañjayassa samayaṃ