Kolitaparibbājako taṃ dūratova āgacchantaṃ disvā "ajja mayhaṃ sahāyakassa mukhavaṇṇo na aññesu divasesu viya, addhā tena amataṃ adhigataṃ bhavissatī"ti amatādhigamaṃ pucchi. Sopissa "āma āvuso amataṃ adhigatan"ti paṭijānitvā tameva gāthaṃ abhāsi. Gāthāpariyosāne kolito sotāpattiphale patiṭṭhahitvā āha "kahaṃ kira samma satthā vasatī"ti. `veḷuvane Kira samma vasatī'ti evaṃ no ācariyena assajittherena kathitanti. Tenahi samma āyāma, satthāraṃ passissāmāti. Sāriputtatthero ca nāmesā sadāpi ācariyapūjako, tasmā sahāyaṃ kolitamāṇavaṃ evamāha "samma amhehi adhigataṃ amataṃ amhākaṃ ācariyassa sañjayaparibbājakassapi kathessāma. Bujjhamāno paṭivijjhissati, appaṭivijjhanto amhākaṃ saddahitvā satthu santikaṃ gamissati, buddhānaṃ desanaṃ sutvā maggaphalapaṭivedhaṃ karissatī"ti.
Tato dvepi janā sañjayassa santikaṃ gantvā "ācariya tvaṃ kiṃ karosi, buddho loke uppanno, svākkhāto dhammo, supaṭipanno saṃgho, āyāma dasabalaṃ passissāmā"ti. So "kiṃ vadetha tātā"ti tepi vāretvā lābhaggayasaggappattimeva tesaṃ dīpeti. Te "amhākaṃ evarūpo antevāsikavāso niccameva hotu, tumhākaṃ pana gamanaṃ vā agamanaṃ vā jānāthā"ti āhaṃsu. Sañjayo "ime ettakaṃ jānantā Mama vacanaṃ na karissantī"ti ñatvā "gacchatha tumhe tātā, ahaṃ mahallakakāle antevāsikavāsaṃ vasituṃ na sakkomī"ti āha. Te anekehipi kāraṇehi taṃ bodhetuṃ asakkontā attano ovāde vattamānaṃ janaṃ ādāya veḷuvanaṃ agamaṃsu. Atha tesaṃ pañcasu antevāsikasatesu aḍḍhateyyasatā nivattiṃsu, aḍḍhateyyasatā tehi saddhiṃ agamaṃsu.
Satthā catuparisamajjhe dhammaṃ desento te dūratova disvā bhikkhū āmantesi "ete dve bhikkhave sahāyā āgacchanti kolito ca upatisso ca, etameva sāvakayugaṃ bhavissati aggaṃ bhaddayugan"ti. Atha nesaṃ parisāya cariyavasena dhammadesanaṃ vaḍḍhesi. Ṭhapetvā dve aggasāvake sabbepi te aḍḍhateyyasatā paribbājakā arahattaṃ pāpuṇiṃsu. Satthā "etha bhikkhavo"ti hatthaṃ pasāresi. Sabbesaṃ kesamassu antaradhāyi, iddhimayapattacīvaraṃ kāyapaṭibaddhaṃ ahosi. Dvinnaṃ aggasāvakānaṃpi iddhimayapattacīvaraṃ āgataṃ, uparimaggattayakiccaṃ pana na niṭṭhāti. Kasmā? sāvakapāramiñāṇassa mahantatāya.