Mahākassapatthero "ayaṃ mayhaṃ satthā bhavissati, imāhaṃ uddissa pabbajito"ti diṭṭhaṭṭhānato paṭṭhāya oṇato gantvā tīsu ṭhānesu vanditvā "satthā me bhante bhagavā, sāvakohamasmi, satthā me bhante bhagavā, sāvakohamasmī"ti āha. Atha naṃ bhagavā avoca "kassapa sace tvaṃ imaṃ nipaccakāraṃ mahāpaṭhaviyā kareyyāsi, sāpi dhāretuṃ na sakkuṇeyya. Tathāgatassa evaṃ guṇamahantatāya tayā kato nipaccakāro mayhaṃ lomampi cāletuṃ na sakkoti. Nisīda kassapa, dāyajjaṃ te dassāmī"ti. Athassa bhagavā tīhi ovādehi upasampadaṃ adāsi. Datvā bahuputtakanigrodhamūlato nikkhamitvā theraṃ pacchāsamaṇaṃ katvā maggaṃ paṭipajji. Satthu sarīraṃ dvattiṃsamahāpurisalakkhaṇavicittaṃ, mahākassapassa sattamahāpurisalakkhaṇapaṭimaṇḍitaṃ. So kāñcanamahānāvāya pacchābandho viya satthu padānupadikaṃ anugañchi. Satthā thokaṃ maggaṃ gantvā maggā okkamma aññatarasmiṃ rukkhamūle nisajjākāraṃ dasseti, thero "nisīditukāmo satthā"ti ñatvā attano pārutaṃ paṭṭapilotikaṃ saṃghāṭiṃ catugguṇaṃ katvā paññāpesi.

Satthā tattha nisīditvā hatthena cīvaraṃ parāmasanto "mudukā kho tyāyaṃ kassapa paṭṭapilotikāsaṅghāṭī"ti āha. Thero "satthā me saṅghāṭiyā mudukabhāvaṃ katheti, pārupitukāmo bhavissatī"ti ñatvā "pārupatu bhante bhagavā saṅghāṭin"ti āha. Tvaṃ kiṃ pārupissasi kassapāti. Tumhākaṃ nivāsanaṃ labhanto pārupissāmīti. "kimpana tvaṃ kassapa evaṃ imaṃ paribhogajiṇṇaṃ paṃsukūlaṃ dhāretuṃ sakkhissasi. Mayā hi imassa paṃsukūlassa gahitadivase udakapariyantaṃ katvā mahāpaṭhavī kampi, imaṃ buddhānaṃ paribhogajiṇṇacīvaraṃ nāma jiṇṇaṃ na sakkā parittaguṇena dhāretuṃ, paṭibalena idaṃ

@3 cha.Ma.,i. satasākho 4 cha.Ma.,i. oṇatoṇato 5 Sī.,i.,cha.Ma. guṇamahantataṃ jānatā tayā