Byattā itthī "yato mayhaṃ sāmiko bhāgabhattaṃ deti, mayāpi imasmiṃ dāne bhāginiyā bhavitabban"ti attano bhāgabhattampi upariṭṭhapaccekabuddhassa patte patiṭṭhapetvā adāsi. Annabhāro bhattapattaṃ āharitvā paccekabuddhassa hatthe ṭhapetvā "bhante evarūpā dujjīvitā muccāmā"ti āha. Evaṃ hotu mahāpuññāti. So attano uttarasāṭakaṃ ekasmiṃ padese attharitvā "bhante idha nisīditvā paribhuñjathā"ti āha. Paccekabuddho tattha nisīditvā navavidhaṃ pāṭikullaṃ paccavekkhitvā paribhuñji. Paribhuttakāle annabhāro pattadhovanaudakaṃ adāsi. Paccekabuddho niṭṭhitabhattakicco:-

"icchitaṃ paṭṭhitaṃ tuyhaṃ khippameva samijjhatu

sabbe pūrentu saṅkappā cando pannaraso yathā.

Icchitaṃ paṭṭhitaṃ tuyhaṃ khippameva samijjhatu