@6 khu.thera. 26/901-3/389 anuruddhattheragāthā Kasmā panāyaṃ uccākulikānaṃ aggoti vutto, kiṃ tato uccākulikatarā natthīti? āma natthi. Tassa hi mātā sākiyānīnaṃ antare vayena sabbajeṭṭhikā, so evaṃ vā sākiyakule sampattaṃ rajjaṃ pahāya pabbajito. Tasmā uccākulikānaṃ aggoti vutto. Apica pubbe paṭṭhanānubhāvena esa anupaṭipāṭiyā pañcajātisatāni rājakule nibbattitvā rajjaṃ kāresiyeva. So imināpi kāraṇena uccākulikānaṃ aggoti vutto.

Pañhākamme panassa ayamanupubbikathā:- ayampi hi atīte padumuttarabuddhakāle mahābhogakule nibbatto vuttanayeneva dhammassavanatthāya gato. Taṃdivasaṃ satthārā ekaṃ bhikkhuṃ uccākulikānaṃ bhikkhūnaṃ aggaṭṭhāne ṭhapitaṃ disvā "mayāpi anāgate ekassa buddhassa sāsane uccākulikānaṃ bhikkhūnaṃ aggena bhavituṃ vaṭṭatī"ti tathāgataṃ nimantetvā sattadivasāni buddhappamukhassa bhikkhusaṃghassa mahādānaṃ datvā "bhante ahaṃ imassa dānassa phalena aññaṃ sampattiṃ na ākaṅkhāmi, anāgate pana ekassa buddhassa sāsane uccākulikānaṃ bhikkhūnaṃ aggo bhaveyyan"ti paṭṭhayitvā pādamūle nipajji.

Satthā anāgataṃ olokento samijjhanabhāvaṃ disvā "samijjhissati te idaṃ kammaṃ, ito kappasatasahassāvasāne gotamo nāma buddho uppajjissati, tvaṃ tassa sāsane uccākulikānaṃ bhikkhūnaṃ aggo bhavissasī"ti byākaritvā bhattānumodanaṃ katvā vihāraṃ agamāsi. Sopi taṃ byākaraṇaṃ sutvā uccākulikānaṃ saṃvattanikakammaṃ pucchitvā dhammāsanāni kāretvā tesu paccattharaṇāni santharāpetvā dhammavījaniyo dhammakathikavattaṃ uposathāgāre padīpateladānanti evaṃ yāvajīvaṃ bahuvidhaṃ kalyāṇakammaṃ katvā tattha kālaṃ katvā devesu ca manussesu ca saṃsaranto kassapadasabalassa ca amhākañca bhagavato antare bārāṇasiyaṃ kuṭumbikassa ghare nibbatto.