Apica:-

"bhāgyavā bhaggavā yutto bhagehi ca vibhattavā

bhattavā vantagamano bhavesu bhagavā gato"ti imissā gāthāya vasenassa padassa vitthārato attho veditabbo. So ca visuddhimagge buddhānussatiniddese vuttoyeva.

Ettāvatā cettha evamme sutanti vacanena yathāsutaṃ dhammaṃ desento bhagavato dhammasarīraṃ paccakkhaṃ karoti. Tena "na idaṃ atikkantasatthukaṃ pāvacanaṃ, ayaṃ vo satthā"ti satthu adassanena ukkaṇṭhitaṃ janaṃ samassāsesi. Ekaṃ samayaṃ bhagavāti vacanena tasmiṃ samaye bhagavato avijjamānabhāvaṃ dassento rūpakāyaparinibbānaṃ sādheti. Tena "evaṃvidhassa nāma ariyassa dhammassa desako dasabaladharo vajirasaṅghāṭasamānakāyo sopi bhagavā parinibbuto, kena aññena jīvite āsā janetabbā"ti jīvitamadamattaṃ janaṃ saṃvejeti, saddhamme cassa ussāhaṃ janeti. Evanti ca bhaṇanto desanāsampattiṃ niddisati. Me sutanti sāvakasampattiṃ. Ekaṃ samayanti kālasampattiṃ. Bhagavāti desakasampattiṃ.