Tasmiṃ pana divase sā seṭṭhidhītā mahākaccāyanattheraṃ sattahi bhikkhūhi parivutaṃ tucchapattaṃ gacchantaṃ disvā "ayaṃ suvaṇṇavaṇṇo eko brāhmaṇabandhubhikkhu yathādhoteneva pattena gacchati, mayhañca aññaṃ dhanaṃ natthi. Asukaseṭṭhidhītā pana imesaṃ kesānaṃ atthāya pesesi. Idāni ito laddhauppādena sakkā therassa deyyadhammaṃ dātun"ti dhātiṃ pesetvā there nimantetvā antogehe nisīdāpesi. Therānaṃ nisinnakāle gabbhaṃ pavisitvā dhātiyā attano kese kappāpetvā "amma ime kese asukāya nāma seṭṭhidhītāya datvā yaṃ sā deti, taṃ āhara, ayyānaṃ piṇḍapātaṃ dassāmā"ti. Dhātī piṭṭhihatthena assūni puñchitvā ekena hatthena hadayamaṃsaṃ sandhāretvā therānaṃ santike paṭicchādetvā te kese ādāya tassā seṭṭhidhītāya santikaṃ gatā.

Paṇītaṃ nāma sāravantaṃpi sayaṃ upanītaṃ gāravaṃ na janeti, tasmā seṭṭhidhītā cintesi "ahaṃ pubbe bahunāpi dhanena ime kese āharāpetuṃ nāsakkhiṃ, idāni pana chinnakālato paṭṭhāya na yathāmūlameva lacchissatī"ti dhātiṃ āha "ahaṃ pubbe tava sāminiyā bahunāpi dhanena kese āharāpetuṃ nāsakkhiṃ, yattha katthaci nītā pana na jīvakesā nāma aṭṭha kahāpaṇe agghantī"ti aṭṭheva kahāpaṇe adāsi. Dhātī kahāpaṇe āharitvā seṭṭhidhītāya adāsi. Seṭṭhidhītā ekekaṃ piṇḍapātaṃ ekekaṃ kahāpaṇikaṃ katvā therānaṃ dāpesi. Thero āvajjitvā seṭṭhidhītāya upanissayaṃ disvā "kahaṃ seṭṭhidhītā"ti pucchi. Gabbhe ayyāti. Pakkosatha nanti. Sā theresu gāravena ekavacanena āgantvā there vanditvā balavasaddhaṃ uppādesi. Sukhette patiṭṭhitapiṇḍapāto diṭṭheva dhamme vipākaṃ detīti saha therānaṃ vandanena kesā pakatibhāveyeva aṭṭhaṃsu. Therāpi taṃ piṇḍapātaṃ gahetvā passantiyāyeva seṭṭhidhītāya vehāsaṃ abbhuggantvā kāñcanavanuyyāne otariṃsu.

@5 Sī. nītā pana jīvakesā, cha.Ma. vinipātā pana nijjīvakesā