14. Etadaggavagga 2. Dutiyavagga

cūḷapanthakattheravatthu

[198-200] Dutiyassa paṭhame manomayanti manena nibbattitaṃ. "manomayena kāyena, iddhiyā upasaṅkamī"ti vuttaṭṭhānasmiṃ manena katakāyo manomayakāyo nāma jāto. "aññataraṃ manomayaṃ kāyaṃ upapajjatī"ti vuttaṭṭhāne manena nibbattitakāyo manomayakāyo nāma jāto. Ayamidha adhippeto. Tattha aññe bhikkhū manomayaṃ kāyaṃ nibbattentā tayo vā cattāro vā nibbattenti, na bahuke. Ekasadiseeva katvā nibbattenti ekavidhameva kammaṃ kurumāne. Cūḷapanthakatthero pana ekāvajjanena samaṇasahassaṃ māpesi. Dvepi jane na ekasadisameva akāsi na ekavidhakammaṃ kurumāne. Tasmā manomayaṃ kāyaṃ abhinimminantānaṃ aggo nāma jāto.

Cetovivaṭṭakusalānampi cūḷapanthakova aggo, paññāvivaṭṭakusalānampana mahāpanthakatthero aggoti vutto. Tattha cūḷapanthakatthero catunnaṃ rūpāvacarajjhānānaṃ lābhitāya "cetovivaṭṭakusalo"ti vutto, mahāpanthakatthero catunnaṃ arūpāvacarajjhānānaṃ lābhitāya "paññāvivaṭṭakusalo"ti vutto. Cūḷapanthako ca samāpattikusalatāya cetovivaṭṭakusalo nāma, mahāpanthako vipassanākusalatāya paññāvivaṭṭakusalo nāma. Eko cettha samādhilakkhaṇe cheko, eko vipassanālakkhaṇe. Tathā eko samādhigāḷhe, eko vipassanāgāḷhe. Eko cettha aṅgasaṅkhitte cheko, eko ārammaṇasaṅkhitte. Tathā eko aṅgavavatthāne cheko, eko ārammaṇavavatthāneti evamettha yojanā kātabbā.