Imināva niyāmena satthā sakkārasammānaṃ anubhavanto devasikaṃ yojanaparamaṃ gantvā tiṃsayojanikaṃ kantāraṃ atikkamma khadiravaniyattherassa sabhāgaṭṭhānaṃ patto, thero satthu āgamanaṃ ñatvā attano vasanaṭṭhāne buddhappamukhassa bhikkhusaṃghassa pahonakavihāre dasabalassa gandhakuṭiṃ rattiṭṭhānadivāṭṭhānādīni ca iddhiyā māpetvā tathāgatassa paccuggamanaṃ gato. Satthā alaṅkatapaṭiyattena maggena vihāraṃ pāvisi. Atha tathāgate gandhakuṭiyaṃ paviṭṭhe bhikkhū vassaggena pattasenāsanāni pavisiṃsu. Devatā "akālo āhārassā"ti aṭṭhavidhaṃ pānakaṃ āhariṃsu. Satthā bhikkhusaṃghena saddhiṃ pānakaṃ pivi. Imināva niyāmena tathāgatassa sakkārasammānaṃ anubhavantasseva aḍḍhamāso atikkanto.
Athekacce ukkaṇṭhitabhikkhū ekasmiṃ ṭhāne nisīditvā kathaṃ uppādayiṃsu "satthā dasabalo `mayhaṃ aggasāvakassa kaniṭṭhabhātā'ti vatvā evarūpaṃ navakammikaṃ bhikkhuṃ passituṃ āgato, imassa vihārassa santike jetavanamahāvihāro vā veḷuvanamahāvihārādayo vā kiṃ karissanti. Ayaṃpi bhikkhu evarūpassa navakammassa kārako, kiṃ nāma samaṇadhammaṃ karissatī"ti. Atha satthā cintesi "mayi ciraṃ vasante idaṃ ṭhānaṃ ākiṇṇaṃ bhavissati, āraññakabhikkhū nāma pavivekatthikā honti, revatassa aphāsuvihāro bhavissatī"ti tato revatassa divāṭṭhānaṃ gato. Thero ekakova caṅkamanakoṭiyaṃ ālambanaphalakaṃ nissāya pāsāṇaphalake nisinno satthāraṃ dūratova āgacchantaṃ disvā paccuggantvā vandi.
Atha naṃ satthā pucchi "revata imaṃ vāḷamigaṭṭhānaṃ, caṇḍānaṃ hatthiassādīnaṃ saddaṃ sutvā kinti karosī"ti. Tesaṃ me bhante saddaṃ suṇato araññasmiṃ pīti nāma uppajjatīti. Satthā imasmiṃ ṭhāne revatattherassa pañcahi gāthāsatehi araññapasaṃsaṃ nāma kathetvā punadivase avidūre ṭhāne piṇḍāya caritvā revatattheraṃ āmantetvā yehi bhikkhūhi therassa avaṇṇo kathito, tesaṃ kattarayaṭṭhiupāhanatelanāḷicchattānaṃ pammussanabhāvaṃ akāsi. Te attano parikkhāratthāya nivattā āgatamaggeneva gacchantā ṭhapitaṭṭhānaṃ sallakkhetuṃ na sakkonti. Paṭhamamhi te alaṅkatapaṭiyattena maggena gantvā taṃ divasaṃ pana visamamaggena gacchantā tasmiṃ tasmiṃ ṭhāne ukkuṭikaṃ nisīdanti, jaṇṇukena gacchanti. Te gumbe gacche kaṇṭake ca maddantā attano vasitaṃ sabhāgaṭṭhānaṃ gantvā tasmiṃ tasmiṃ khadirakhāṇuke attano chattaṃ sañjānanti, upāhanakattarayaṭṭhitelanāḷiṃ sañjānanti. Te tasmiṃ samaye "iddhimā ayaṃ bhikkhū"ti ñatvā attano parikkhāre ādāya "dasabalassa paṭiyattasakkāro nāma evarūpo hotī"ti vadantā agamaṃsu.