Soṇakoḷivisattheravatthu

[205] Sattame āraddhaviriyānanti paggahitaviriyānaṃ paripuṇṇaviriyānaṃ. Soṇo koḷivisoti soṇoti tassa nāmaṃ, koḷivisoti gottaṃ. Koṭivessoti vā attho, issariyena koṭipattassa vessakulassa dārakoti adhippāyo. Yasmā pana aññesaṃ bhikkhūnaṃ viriyaṃ nāma vaḍḍhetabbaṃ hoti, therassa pana bhāvetabbameva ahosi. Tasmā esa āraddhaviriyānaṃ aggo nāma jāto.

Tassa pañhākamme ayamanupubbikathā:- ayaṃ kira atīte padumuttarabuddhakāle seṭṭhikule nibbatti, tassa sirivaḍḍhakumārotissa nāmaṃ akaṃsu. So vayappatto purimanayeneva vihāraṃ gantvā parisapariyante ṭhito dhammaṃ suṇanto satthāraṃ ekaṃ bhikkhuṃ āraddhaviriyānaṃ aggaṭṭhāne ṭhapentaṃ disvā "mayāpi anāgate evarūpena bhavituṃ vaṭṭatī"ti desanāvasāne dasabalaṃ nimantetvā sattāhaṃ mahādānaṃ datvā vuttanayeneva paṭṭhanaṃ akāsi. Satthā tassa paṭṭhanāya samijjhanabhāvaṃ disvā purimanayeneva byākaritvā vihāraṃ gato.

Sopi sirivaḍḍhaseṭṭhī yāvajīvaṃ kusalaṃ katvā devamanussesu saṃsaranto kappasatasahassaṃ atikkamitvā imasmiṃ kappe parinibbute kassapadasabale anuppanne amhākaṃ bhagavati bārāṇasiyaṃ kulagehe paṭisandhiṃ gaṇhi. So attano sahāyakehi saddhiṃ gaṅgāya kīḷaṃ kīḷati. Atha naṃ ekasmiṃ samaye eko jiṇṇacīvariko paccekabuddho "bārāṇasiṃ upanissāya gaṅgāya tīre paṇṇasālaṃ katvā vassaṃ upagacchissāmī"ti udakena samupabyūḷhe daṇḍake ca valliyo ca saṅkaḍḍhati. Ayaṃ kumāro sahāyakehi saddhiṃ gantvā abhivādetvā ṭhito "bhante kiṃ karothā"ti pucchi. Kumāra upakaṭṭhe antovasse pabbajitānaṃ vasanaṭṭhānaṃ nāma laddhuṃ vaṭṭatīti. "bhante ajjeva ekadivasaṃ ayyo yathā tathā āgametu, ahaṃ sve ayyassa vasanaṭṭhānaṃ karissāmī"ti āha.