imesaṃ pana ubhinnaṃpi therānaṃ pañhākamme ayamanupubbikathā:- ete kira dvepi atīte padumuttarabuddhakāle haṃsavatīnagare gahapatimahāsālakule nibbattiṃsu. Tesaṃ daharakāle nāmaṃ vā gottaṃ vā na kathīyati. Te vayappattā pana gharāvāse patiṭṭhāya attano pituaccayena ubhopi attano ratanakoṭṭhāgārakammike pakkosāpetvā aparimāṇaṃ dhanaṃ disvā "imaṃ ettakaṃ dhanarāsiṃ ayyakapeyyakādayo attanā saddhiṃ gahetvā gantuṃ nāsakkhiṃsu, amhehi dāni yena kenaci upāyena imaṃ dhanaṃ gahetvā gantuṃ vaṭṭatī"ti te ubhopi janā catūsu ṭhānesu kapaṇaddhikādīnaṃ mahādānaṃ dātuṃ āraddhā. Eko attano dānagge āgatāgataṃ janaṃ āpucchitvā yāgukhajjakādīsu yassa yaṃ paṭibhāti, tassa taṃ adāsi, tassa teneva kāraṇena āgatavācakoti

@5 cha.Ma. ayyakapayyakādayo 6 Sī. dvāresu 7 Sī. āgatayācakoti, cha.Ma. āgatapākoti Nāmaṃ jātaṃ. Itaro apucchitvāva gahitagahitaṃ bhājanaṃ pūretvā pūretvā deti, tassāpi teneva kāraṇena anāgatavācakoti nāmaṃ jātaṃ, appamādavācakoti attho.

Te ubhopi ekadivasaṃ pātova mukhadhovanatthaṃ bahigāmaṃ agamaṃsu. Tasmiṃ samaye himavantato dve mahiddhikā tāpasā bhikkhācāratthāya ākāsena āgantvā tesaṃ sahāyakānaṃ avidūre otarayamānā "ete passiṃsū"ti ekapasse aṭṭhaṃsu. Te ubhopi janā tesaṃ alābubhājanādiparikkhāraṃ saṃvidhāya antogāmaṃ sandhāya samupayātānaṃ santikaṃ āgamma vandiṃsu. Atha ne tāpasā "kāya velāya āgatattha mahāpuññā"ti āhaṃsu. Te "adhunāva bhante"ti vatvā tesaṃ hatthato alābubhājanāni gahetvā attano attano gehaṃ netvā bhattakiccapariyosāne nibaddhaṃ bhikkhāgahaṇatthaṃ paṭiññaṃ gaṇhiṃsu.