@7 cha.Ma. nisīdati 8 cha.Ma. mayamassa 9 cha.Ma. tumhākaṃ Naṃ sopi kuṭumbiko itaro sahāyako taṃ tāpasaṃ viya pucchi. Atha so tassa vacanaṃ sutvā sakkabhavane cittaṃ ṭhapesi. Te ubhopi paṭṭhitaṭṭhānesuyeva nibbattā.

Paṭhavindharabhavane nibbatto paṭhavindharanāgarājā nāma jāto. So nibbattakkhaṇe attano attabhāvaṃ disvā "amanāpassa vata me ṭhānassa kulupako tāpaso vaṇṇaṃ kathesi, udarena parisakkitvā vicaraṇaṭṭhānametaṃ, nūna so aññaṃ ṭhānaṃ na jānātī"ti vippaṭisārī ahosi. Athassa taṃkhaṇaññeva alaṅkatapaṭiyattāni nāganāṭakāni sabbadisāsu turiyāni paggaṇhiṃsu. So tasmiṃyeva khaṇe taṃ attabhāvaṃ vijahitvā māṇavakavaṇṇī ahosi. Aḍḍhamāsañca cattāro mahārājāno sakkassa upaṭṭhānaṃ gacchanti. Tasmā sopi virūpakkhena nāgaraññā saddhiṃ sakkassa upaṭṭhānaṃ gato. Sakko taṃ dūratova āgacchantaṃ disvā sañjāni. Atha naṃ samīpe āgantvā ṭhitakāle "kahaṃ nibbattosi sammā"ti pucchi. Mā kathesi mahārāja, urena parisakkaṭṭhāne nibbattomhi, tumhe pana kalyāṇamittaṃ labhitthāti. Samma tvaṃ "aṭṭhāne nibbattomhī"ti mā vitakkayi, padumuttaradasabalo loke nibbatti, tvaṃ tassa adhikārakammaṃ katvā imaṃyeva ṭhānaṃ paṭṭhehi, ubho sukhaṃ vasissāmāti. So "evaṃ deva karissāmī"ti gantvā padumuttaradasabalaṃ nimantetvā attano nāgabhavane nāgaparisāya saddhiṃ sabbarattiṃ sakkārasammānaṃ sajjesi.

Satthā punadivase uṭṭhite aruṇe attano upaṭṭhākaṃ sumanattheraṃ āmantesi "sumana ajja tathāgato dūraṃ bhikkhācāraṃ gamissati, mā puthujjanabhikkhū āgacchantu, tipiṭakapaṭisambhidappattā chaḷabhiññā ca āgacchantū"ti. Thero satthu vacanaṃ sutvā sabbesaṃ ārocesi. Satthārā saddhiṃ satasahassabhikkhū ākāsaṃ pakkhandiṃsu. Paṭhavindharo nāgaparisāya saddhiṃ dasabalassa paccuggamanaṃ āgantvā satthāraṃ parivāretvā samuddamatthakena maṇivaṇṇā ūmiyo maddamānaṃ bhikkhusaṃghaṃ oloketvā ādito satthāraṃ,