@4 cha.Ma.,i. tepiṭakā paṭisambhidāppattā chaḷabhiññāva 5 cha.Ma.,i. āgato

@6 cha.Ma. samuddamatthake Pariyosāne saṃghanavakaṃ tathāgatassa puttaṃ uparevatasāmaṇeraṃ nāma olokento "anacchariyo sesakānaṃ evarūpo iddhānubhāvo, imassa pana taruṇabāladārakassa evarūpo iddhānubhāvo ativiya acchariyo"ti pītipāmojjaṃ uppādesi.

Athassa bhavane dasabale nisinne sesabhikkhūsu koṭito paṭṭhāya nisīdantesu satthu sammukhaṭṭhāneyeva uparevatasāmaṇerassa āsanaṃ pāpuṇi. Nāgarājā yāguṃ dentopi khajjakaṃ dentopi sakiṃ dasabalaṃ oloketi, sakiṃ uparevatasāmaṇeraṃ. Tassa kira sarīre satthu sarīre viya dvattiṃsa mahāpurisalakkhaṇāni paññāyanti. Tato nāgarājā "ayaṃ sāmaṇero buddhānaṃ sadiso paññāyati, kiṃ nu kho hotī"ti cintetvā avidūre nisinnaṃ aññataraṃ bhikkhuṃ pucchi "ayaṃ bhante sāmaṇero dasabalassa kiṃ hotī"ti. Putto mahārājāti. So cintesi "mahā vatāyaṃ bhikkhu, evarūpassa sobhaggappattassa tathāgatassa puttabhāvaṃ labhi. Sarīraṃ cassa ekadesena buddhānaṃ sarīrasadisaṃ paññāyati, mayāpi anāgate evarūpena bhavituṃ vaṭṭatī"ti sattāhaṃ mahādānaṃ datvā "bhante ahaṃ imassa adhikārakammassānubhāvena ayaṃ uparevato viya anāgate ekassa buddhassa putto bhaveyyan"ti paṭṭhanaṃ akāsi. Satthā anantarāyaṃ disvā "anāgate gotamabuddhassa putto bhavissasī"ti byākaritvā pakkāmi.

Paṭhavindharopi puna aḍḍhamāse sampatte virūpakkhena saddhiṃ sakkassa upaṭṭhānaṃ gato. Atha naṃ samīpe ṭhitaṃ sakko pucchi "paṭṭhito te samma ayaṃ devaloko"ti. Na paṭṭhito sammāti. Kiṃ dosaṃ addasāti. Doso natthi mahārāja, ahaṃ pana dasabalassa puttaṃ uparevataṃ sāmaṇeraṃ passiṃ. Tassa me diṭṭhakālato paṭṭhāya aññattha cittaṃ na namati, svāhaṃ "anāgate ekassa buddhassa evarūpo putto bhaveyyan"ti paṭṭhanaṃ akāsiṃ. Tvaṃpi mahārāja ekaṃ paṭṭhanaṃ karohi, te mayaṃ nibbattaṭṭhāne na vinā bhavissāmāti. Sakko tassa vacanaṃ sampaṭicchitvā ekaṃ mahānubhāvaṃ bhikkhuṃ