@3 cha.Ma. sarīrampissa 4 cha.Ma. mahārājāti 5 cha.Ma.,i. na nami Disvā "katarakulā nu kho nikkhamitvā ayaṃ kulaputto pabbajito"ti āvajjento "ayaṃ bhinnaṃ rajjaṃ sandhāretuṃ samatthassa kulassa putto hutvā cuddasa bhattacchede katvā mātāpitaro pabbajjaṃ anujānāpetvā pabbajito"ti aññāsi. Ñatvā ca pana ajānanto viya dasabalaṃ pucchitvā sattāhaṃ mahāsakkāraṃ katvā "bhante ahaṃ imassa kalyāṇakammassa nissandena tumhākaṃ sāsane ayaṃ kulaputto viya anāgate ekassa buddhassa sāsane saddhāpabbajitānaṃ aggo bhaveyyan"ti paṭṭhanaṃ akāsi. Satthā anantarāyaṃ disvā "tvaṃ mahārāja anāgate gotamabuddhasāsane saddhāpabbajitānaṃ aggo bhavissasī"ti byākaritvā pakkāmi. Sakko ca attano devapurameva gato.

Te ubhopi nibbattaṭṭhānato cavitvā devamanussesu saṃsarantā anekasahassakappe atikkamiṃsu. Ito pana dvānavutikappamatthake pusso nāma buddho loke udapādi. Tassa pitā mahindo nāma rājā ahosi, vemātikā tayo kaniṭṭhabhātaro. Rājā divase "mayhaṃyeva buddho mayhaṃ dhammo mayhaṃ saṃgho"ti mamāyanto sayameva dasabalaṃ nibaddhaṃ bhojanaṃ bhojeti.

Athassa ekadivasaṃ paccanto kupito. Rājā tayo putte āmantesi "tātā paccanto kupito, tumhehi vā mayā vā gantabbaṃ. Yadi ahaṃ gacchāmi, tumhehi iminā niyāmena dasabalo paricaritabbo"ti. Te tayopi ekappahāreneva āhaṃsu "tāta tumhākaṃ gamanakiccaṃ natthi, mayaṃ core vidhamissāmā"ti pitaraṃ vanditvā paccantaṃ gantvā core vidhamitvā vijitasaṅgāmā hutvā nivattiṃsu. Te antarāmagge pādamūlakehi saddhiṃ mantayiṃsu "tātā amhākaṃ āgatakkhaṇeyeva pitā varaṃ dassati, kataraṃ varaṃ gaṇhāmā"ti. Ayya tumhākaṃ pitu accayena dullabhaṃ nāma natthi, tumhākaṃ pana jeṭṭhabhātikaṃ pussabuddhaṃ paṭijagganavaraṃ gaṇhathā"ti āhaṃsu. "kalyāṇaṃ tumhehi