@4 cha.Ma.,i. so putte āmantesi 5 cha.Ma. ayyā Vuttan"ti sabbepi ekacittā hutvā gantvā pitaraṃ addasaṃsu. Tadā pitā tesaṃ pasīditvā varaṃ adāsi. Te "temāsaṃ tathāgataṃ paṭijaggissāmā"ti varaṃ yāciṃsu. Rājā "ayaṃ dātuṃ na sakkā, aññaṃ varaṃ gaṇhathā"ti āha. Tāta amhākaṃ aññena varena kiccaṃ natthi, sace tumhe dātukāmā, etaṃyeva no varaṃ dethāti. Rājā tesu punappunaṃ kathentesu attanā paṭiññātattā "na sakkā na dātun"ti cintetvā āha "tātā ahaṃ tumhākaṃ varaṃ demi, apica kho pana buddhā nāma durāsadā honti sīho viya ekacarā, dasabalaṃ paṭijaggantā appamattā bhaveyyāthā"ti.

Te cintayiṃsu "amhehi tathāgataṃ paṭijaggantehi anucchavikaṃ katvā paṭijaggituṃ vaṭṭatī"ti sabbepi ekacittā hutvā dasasīlāni ca samādāya nirāmagandhā hutvā satthu dānaggapariggāhaṇake tayo purise ṭhapayiṃsu. Tesu eko dhanadhaññuppādako ahosi, eko māpako, eko dānasaṃvidhāyako. Tesu dhanadhaññuppādako paccuppanne bimbisāramahārājā jāto, māpako visākho upāsako, dānasaṃvidhāyako raṭṭhapālattheroti. So tattha yāvajīvaṃ kusalaṃ katvā devapure nibbatto. Ayaṃ pana rāhulatthero nāma kassapadasabalakāle kiṃkissa rañño jeṭṭhaputto hutvā nibbatti, paṭhavindharakumārotissa nāmaṃ akaṃsu. Tassa satta bhaginiyo ahesuṃ. Tā dasabalassa satta pariveṇāni kārayiṃsu. Paṭhavindharo uparajjaṃ labhi. So tā bhaginiyo āha "tumhehi kāritapariveṇesu mayhaṃpi ekaṃ dethā"ti. Bhātika tumhe uparājaṭṭhāne ṭhitā, tumhehi nāma amhākaṃ dātabbaṃ, tumhe aññaṃ pariveṇaṃ karothāti. So tāsaṃ vacanaṃ sutvā pañca vihārasatāni kāresi. Pañca pariveṇasatānītipi vadanti. So tattha yāvajīvaṃ kusalaṃ katvā devapure nibbatti. Imasmiṃ pana buddhuppāde paṭhavindharakumāro amhākaṃ bodhisattassa aggamahesiyā kucchismiṃ paṭisandhiṃ gaṇhi, tassa sahāyako kururaṭṭhe thullakoṭṭhitanigame raṭṭhapālaseṭṭhigehe nibbatti.