@8 aṅ.catukka. 21/177/188 rāhulasutta Avassikabhikkhukāle andhavane nisinno cūḷarāhulovādaṃ kathesi. Desanāpariyosāne rāhulatthero koṭisatasahassāhi devatāhi saddhiṃ arahattaṃ pāpuṇi, sotāpanna- sakidāgāmianāgāmidevatānaṃ gaṇanā nāma natthi. Atha satthā aparabhāge ariyasaṃghamajjhe nisinno theraṃ imasmiṃ sāsane sikkhākāmānaṃ aggaṭṭhāne ṭhapesi.
Satthari pana kururaṭṭhe cārikāya nikkhamitvā thullakoṭṭhitaṃ anuppatte raṭṭhapālo kulaputto satthu dhammadesanaṃ sutvā paṭiladdhasaddho mātāpitaro anujānāpetvā dasabalaṃ upasaṅkamitvā satthu āṇattiyā aññatarassa therassa santike pabbaji. Tassa pabbajitadivasato paṭṭhāya seṭṭhigahapati bhikkhū attano nivesanadvāre gacchante disvā "kiṃ tumhākaṃ imasmiṃ gehe kammaṃ, ekova puttako ahosi, taṃ gaṇhitvā gatattha, idāni kiṃ karissathā"ti akkosati paribhāsati. Satthā aḍḍhamāsaṃ thullakoṭṭhite vasitvā puna sāvatthiṃyeva agamāsi. Athāyasmā raṭṭhapālo yoniso manasikāre kammaṃ katvā vipassanaṃ vaḍḍhetvā arahattaṃ pāpuṇi. So satthāraṃ anujānāpetvā mātāpitaro dassanatthaṃ thullakoṭṭhitaṃ gantvā tattha sapadānacārikaṃ piṇḍāya vicaranto pitu nivesane ābhidosikaṃ pūtikummāsaṃ labhitvā taṃ amataṃ viya paribhuñjanto pitarā nimantito adhivāsetvā dutiyadivase pitu nivesane piṇḍapātaṃ paribhuñjitvā alaṅkatapaṭiyatte itthījane asubhasaññaṃ uppādetvā ṭhitakova dhammaṃ desetvā jiyā mutto viya nārāco ākāse uppatitvā korabyassa rañño migāparaṃ gantvā maṅgalasilāpaṭṭe nisinno dassanatthāya āgatassa rañño catupārijuññapaṭimaṇḍitaṃ dhammaṃ desetvā anupubbena cārikañcaramāno puna satthu santikaṃyeva āgato. Evametaṃ vatthu samuṭṭhitaṃ. Atha satthā aparabhāge ariyagaṇamajjhe nisinno theraṃ imasmiṃ sāsane saddhāpabbajitānaṃ kulaputtānaṃ aggaṭṭhāne ṭhapesīti.