Mahāsubhaddā ugganagare micchādiṭṭhikule vasamānā "satthā maṃ anukampatū"ti uposathaṃ adhiṭṭhāya nirāmagandhā hutvā uparipāsādatale ṭhitā "imāni pupphāni antare aṭhatvā dasabalassa matthake vitānāni hutvā tiṭṭhantu, dasabalo imāya saññāya sve pañcahi bhikkhusatehi saddhiṃ mayhaṃ bhikkhaṃ gaṇhatū"ti saccakiriyaṃ katvā aṭṭha pupphamuṭṭhiyo vissajjesi. Pupphāni gantvā dhammadesanavelāya satthu matthake vitānāni hutvā aṭṭhaṃsu. Satthā taṃ sumanapupphavitānaṃ disvā citteneva subhaddāya bhikkhaṃ adhivāsetvā punadivase aruṇe uṭṭhite ānandattheraṃ āha "ānanda mayaṃ ajja dūraṃ bhikkhācāraṃ gamissāma, puthujjanānaṃ adatvā ariyānaṃyeva salākaṃ dehī"ti. Thero bhikkhūnaṃ ārocesi "āvuso satthā ajja dūraṃ bhikkhācāraṃ gamissati, puthujjanā mā gaṇhantu, ariyāva salākaṃ gaṇhantū"ti. Kuṇḍadhānatthero "āhara āvuso salākan"ti paṭhamaṃyeva hatthaṃ pasāresi. "āvuso satthā tādisānaṃ bhikkhūnaṃ salākaṃ na dāpeti, ariyānaṃyeva dāpetī"ti vitakkaṃ uppādetvā gantvā satthu ārocesi. Satthā "āharāpentassa salākaṃ dehī"ti āha. Thero cintesi "sace kuṇḍadhānassa salākaṃ dātuṃ na yutto assa, addhā satthā naṃ paṭibāheyya, bhavissati ekaṃ kāraṇan"ti "kuṇḍadhānassa salākaṃ dassāmī"ti āgamanaṃ abhinīhari. Kuṇḍadhānatthero

@4 cha.Ma.,i. paṭṭhapesi 5 cha.Ma. upatthambhakaṃ 6 cha.Ma.,i. vitānaṃ. evamuparipi

@7 cha.Ma. sumanapupphamuṭṭhiyo 8 cha.Ma. ānando 9 Ma. na gāhāpesi 10 cha.Ma.,i. salākā