Brāhmaṇā "ayaṃ amhākaṃ jīvikānaṃ maggo"ti ñatvā vaṅgīsamāṇavaṃ paṭicchannayāne nisīdāpetvā gāmanigamarājadhāniyo gantvā nagaradvāre vā nigamadvāre

Tesaṃ kathaṃ sutvā bahū janā lañcaṃ datvā passitukāmā honti. Rājarājamahāmattā tesaṃ santikaṃ gantvā "ācariyassa jānanaviseso kin"ti pucchanti. Tumhe na jānātha, sakalajambūdīpe amhākaṃ ācariyasadiso añño paṇḍito nāma natthi, tivassamatthake matakānaṃpi sīsaṃ āharāpetvā nakhena ākoṭetvā "ayaṃ satto asukaṭṭhāne nibbatto"ti jānāti. Vaṅgīsopi mahājanakaṅkhāchedanatthaṃ te te jane avāhetvā attano attano gatiṃ kathāpeti. Taṃ nissāya mahājanassa hatthato sataṃpi sahassaṃpi labhati.

Brāhmaṇā vaṅgīsamāṇavaṃ ādāya yathāruciṃ vicaritvā puna sāvatthiṃ āgamiṃsu. Vaṅgīso jetavanamahāvihārassa avidūraṭṭhāne ṭhito cintesi "samaṇo gotamo paṇḍitoti vadati, kiṃ nu kho pana sabbakālaṃ mayā imesaṃyeva vacanaṃ karontena carituṃ vaṭṭati, paṇḍitānaṃpi santikaṃ gantuṃ vaṭṭatī"ti. So brāhmaṇe āha "tumhe gacchatha, ahaṃ na bahukehi saddhiṃ gantvā samaṇaṃ gotamaṃ passissāmī"ti. Te āhaṃsu "vaṅgīsa mā te rucci samaṇaṃ gotamaṃ passituṃ. Yo hi naṃ passati, taṃ so māyāya āvaṭṭetī"ti. Vaṅgīso tesaṃ kathaṃ anādayitvā satthu santikaṃ gantvā madhurapaṭisaṇṭhāraṃ katvā ekamantaṃ nisīdi.

Atha naṃ satthā pucchi "vaṅgīsa kiñci sippaṃ jānāsī"ti. Āma bho gotama chavasīsamantaṃ nāmetaṃ jānāmīti. Kiṃ so manto karotīti. Tivassamatthake matānaṃpi taṃ mantaṃ jappitvā sīsaṃ nakhena ākoṭetvā nibbattaṭṭhānaṃ jānāmīti. Satthā tassa ekaṃ niraye uppannassa sattassa sīsaṃ dassesi, ekaṃ manussesu uppannassa, ekaṃ devesu, ekaṃ parinibbutassa sīsaṃ dassesi. So paṭhamaṃ sīsaṃ ākoṭetvā "bho gotama ayaṃ satto nirayaṃ gato"ti āha. Sādhu sādhu vaṅgīsa sudiṭṭhaṃ tayā, ayaṃ