Pañhākamme panassa ayamanupubbikathā:- ayaṃpi hi padumuttarabuddhakāle haṃsavatīnagare kulagehe nibbatto vayappatto purimanayeneva satthu santikaṃ gantvā dhammaṃ suṇanto satthāraṃ ekaṃ bhikkhuṃ samantapāsādikānaṃ aggaṭṭhāne ṭhapentaṃ disvā satthu adhikārakammaṃ katvā taṃ ṭhānantaraṃ paṭṭhetvā yāvajīvaṃ kusalaṃ katvā devamanussesu saṃsaranto imasmiṃ buddhuppāde nālakabrāhmaṇagāme sāribrāhmaṇiyā kucchismiṃ paṭisandhiṃ gaṇhi, upasenadārakotissa nāmaṃ akaṃsu.

So vayappatto tayo vede uggaṇhitvā dasabalassa santike dhammaṃ sutvā paṭiladdhasaddho pabbaji. So upasampadāya ekavassiko hutvā "ariyagabbhaṃ vaḍḍhemī"ti ekaṃ kulaputtaṃ attano santike pabbājetvā upasampādesi. So pavāretvā saddhivihārikassa ekavassikakāle attanā duvasso "dasabalo maṃ passitvā tussissatī"ti saddhivihārikaṃ ādāya dasabalassa santikaṃ āgato. Satthā taṃ vanditvā ekamantaṃ nisinnaṃ pucchi "kativassosi tvaṃ bhikkhū"ti. Duvasso ahaṃ bhagavāti. Ayaṃ pana bhikkhu kativassoti. Ekavasso bhagavāti. Kintāyaṃ bhikkhu hotīti. Saddhivihāriko me bhagavāti. Atha naṃ satthā "atilahuṃ kho tvaṃ moghapurisa bāhullāya āvaṭṭo"ti vatvā anekapariyāyena vigarahi. Thero satthu santikā garahaṃ labhitvā bhagavantaṃ vanditvā "imināva puṇṇacandasassirikena mukhena satthāraṃ parisameva nissāya sādhukāraṃ dāpessāmī"ti taṃdivasaṃyeva ekaṃ ṭhānaṃ gantvā vipassanākammaṃ katvā na cirasseva arahattaṃ pāpuṇi. Tato yasmā thero mahākulato ca nikkhamitvā pabbajito paṭhaviyuttadhammakathiko ca, tasmā tassa dhammakathāya ceva pasīditvā mittāmaccābhiñātikulehi ca nikkhamitvā bahū kuladārakā therassa santikaṃ gantvā pabbajanti. "ahaṃ āraññiko, tumhepi āraññikā bhavituṃ sakkontā pabbajathā"ti terasa dhutaṅgāni ācikkhi "sikkhissāma

@3 cha.Ma.,i. pathavighuṭṭhadhammakathikova 4 cha.Ma.,i. mittāmaccañātikulehi